《前度超渡師》: 第十五集-文杰失戀筆記（三-下）
作為一個缺女嘅男仔，梗係重色輕友，所有嘢都係以女行先啦！所以我決定放棄我嘅籃球隊、放棄呢班好隊友，繼續陪我嘅女神-楚翹。
-
［同學愛新鮮，戀愛大過天，想不想也日夜懷念，連甜夢也不夠甜。］
-
寂靜嘅圖書館逐漸成為我哋偷情嘅場地，當小息鐘聲一響，我哋亦都迅速到圖書館，反正圖書館嘅人唔多，我哋就可以一路當值、一路專心咁傾偈，同時都幫楚翹儲緊服務時數，做靚份成績表，又可以增進我哋嘅感情，簡直抵到爛啦！
-
每日嘅小息就成為咗我哋兩個相處嘅時間，我哋喺課室隔著啲同學，冇辦法傾得更加深入，但圖書館杳無人煙嘅環境完全適合深交，唔使一個月，我覺得我哋嘅關係已經超越一般朋友嘅程度。
-
［當然現在我未成年，讓我膚淺，只知戀愛大過天，忘記有益的格言。］
-
或者可能有人唔知喺圖書館當值究竟要做乜嘢，其實就係企櫃檯負責借還書，或者出去書架上書，雖然企櫃檯係最舒服，但我都係鍾意去書架上書。點解？因為企喺對面書架可以偷望楚翹上書個樣，而唔會俾佢發覺，當佢眼尾見到我望佢嘅時候，我又可以扮搵書，進可攻，退可守。
-
［自動掠過他眼前。怎麼閃，同學始終會遇見。］
------
親密嘅時間去到十二月，我哋嘅關係都keep住咁親密，但都冇人決定踏出第一步，繼續成為密友關係，於是我趁著聖誕節，手寫一張聖誕卡俾佢。當然呢張卡梗係有蹺蹊啦，我將我對楚翹嘅感情透過文字釀入去張聖誕卡入面，希望楚翹可以解讀醞釀喺文字嘅細味，知道我對佢嘅愛意。
-
至於呢張聖誕卡嘅內容，我到而家二十幾歲都仲記憶猶新，信中嘅一字一句，我都記得一清二楚。不過封信寫啲嘢真係好肉麻，我而家都唔敢再寫多次一式一樣嘅文字，真係年少輕狂嘅時期先寫得出。
-
「喂！聖誕快樂，送俾你嘅。」我企喺書架對面，透過書架中間嘅空隙遞張卡俾楚翹。
-
「多謝你喎！不過我冇準備聖誕卡俾你㖭！」楚翹笑住咁多謝我。
-
「小意思啦，最緊要你鍾意就得！」講完之後，大家繼續執書架，繼續做返自己嘅工作，而我亦都係咁偷望楚翹。
-------
唔知係咪我嘅錯覺，自從送咗封信俾楚翹之後，佢就少咗主動搵我傾偈，甚至我搵佢都冇再「秒回」，又或者係隔咗幾日先覆，呢個聖誕假甚至之後都一樣。
-
［她，整晚在寫信，問安的信每日寄。］
-
多疑嘅我就喺度諗：究竟佢係咪因為睇得明封信嘅意思，想避開我嘅追求而唔覆；定係睇唔明封信呢？
-
［旁人話，大戰結束了，誰人未死早回來。］
-
我問我身邊啲朋友，如果收到封情信咁耐都唔覆，而且開始疏遠我，即係咩意思？
-
［傳聞話，同僚亦曾在那戰地，找到你。泥濘內似已沒生氣，唯獨她始終不信等你。］
-
好多朋友都話：仲使問，你溝女失敗囉，楚翹唔鍾意你囉，快啲換個新目標，早日逃脫單身之禍啦！
-
［尚有個她未心死，天天衰老仍然守侯你。時常在想你正在某片地，悠然地呼氣。］
-
唔得，我唔可以放棄，我好鍾意楚翹、好鍾意好鍾意楚翹，我好想繼續望住佢笑，繼續睇佢專心搵書嘅可愛樣。
-
［若你那天，未先死，請抽一晚回來一起，這盼望很悠長，大概應該結尾，不過未。］
-
衛蘭嘅《她整晚在寫信》講述一個女仔成晚喺度寫信，希望佢嘅打緊仗嘅男朋友返嚟，但係封信一去冇回頭，而呢個女仔即使知道個男朋友返嚟嘅機率有幾低微，但都堅持咁等待。
-
而我嘅情況同女主角嘅情景都有啲相似，雖然楚翹唔係軍人，亦都唔係永遠唔見，但我永遠等緊嘅係，佢對我親口嘅答覆。無論係做我女朋友與否。就算我身邊嘅朋友叫我快啲放棄，因為都冇可能等到呢個答覆，我都堅持等待，我真係好唔想放棄一段自己曾經付出咗唔少時間嘅單戀。
-
世界永遠都係殘酷，即使我再點樣緊握都好，到頭來傷害嘅只係盲目付出嘅自己，楚翹唔鍾意我就係唔鍾意我，即使我做幾多都好，都唔會改變對我嘅睇法，我亦都冇再主動搵佢，自動退出呢段關係。
------
自從表白失敗之後，楚翹再冇同我有任何交流、再冇去圖書館當值、完全當我係透明人。而我亦都冇再去圖書館，繼續同班戰友練波。呢班兄弟永遠都係我嘅最強後盾，永遠支持我、永遠陪伴我。我好記得我哋當時放咗學之後就去買啤酒，跟住喺海濱公園「劈酒」，盡訴心中情。
-
而且大家都漸漸「自我遺忘」呢件柒事，唔再同對方再傾偈，直至我哋畢業，我都再冇同佢講任何嘢，我相信我哋之間已經建立咗一道「隱形牆」。
-
不過喺我哋中六嗰一年，我聽朋友講，原來楚翹同隔離學校嘅某個男仔一齊拍拖，仲鬼死咁甜蜜，但如果喺楚翹身邊嘅係我，我又可唔可以比到楚翹一段甜蜜嘅戀情呢？我相信憑著我嘅能力係可以，但呢個可以應該再冇機會了……
-
［我會消失，讓自己一個抑鬱，道謝你絕情，絕得送上這種惡疾。］
-
如果時光可以倒流，我會吞了「我喜歡你」，不開口，十世還做朋友，永遠停留在圖書館卿卿我我的情景。
-
［人總需要勇敢生存，我還是重新許願，例如學會，承受失戀。］
-
故事去到最後，我都冇同楚翹一齊，又點係《文杰失戀筆記呢》？應該係《文杰單戀筆記》先啱。點都好，無論係失戀定單戀，都係俾自己嘅一個經驗，一個更加認識自己嘅經驗。
-
追唔到女仔又唔係人生失敗，現實仲有其他人可以發掘嘅，唔使因為一棵樹而放棄成個森林啦！係咪？
-
加油啦！古文杰，千祈唔可以放棄，你仲未輸㗎！
-
（待續 To be continued）
IG：chingchingstory