《前度超渡師》: 第十四集-文杰失戀筆記（三-上）
經過歲月嘅洗禮，我亦都放低咗曹敏準備好迎接一段新感情，始終自己一個真係好dry，欠缺愛情嘅滋陰。不過曹敏同我拍拖嘅事，其實冇人知道，因為我哋都係冇同其他人講我哋之間嘅關係。
-
去到高中，呢段時間係人生入面過得最燦爛嘅一段時間，除咗有一班損友一齊瘋瘋癲癲咁上堂之外，仲有一個佢，一個令我著迷嘅佢。一個中四嘅插班生-顏楚翹。
-
［懷念美好高中兩年，期望你的青春不變，去到今天。］
-
呢個插班生係一個好文靜嘅女仔，同我癲癲喪喪嘅性格簡直係南轅北轍，但我正正就係俾佢溫文嘅性格吸引，再加上佢都係好鍾意笑，我覺得鍾意笑嘅女仔真係好正，再加上佢有笑眼，笑得更加耀目，完全將我嘅靈魂勾走。
-
開學第一日調位，機緣巧合之下楚翹坐我斜前面，成為我嘅隔離鄰舍，由於我風趣幽默嘅性格實在太受歡迎，搞到楚翹都唔同坐佢隔離嘅男仔傾偈，反而擰轉頭同遠方嘅我傾偈。
-
明明我哋嘅距離淨係差少少，但我哋嘅隔膜就好似銀河咁遠，因為我哋傾偈一嚟唔可以咁明顯，以免老師發現我哋上堂喺度吹水就唔好啦，再加上費事俾隔離啲八公八婆聽到啦，如果傾啲私人啲嘅話題，俾佢哋聽到就仲麻煩，肯定醜事傳千里啦！
-
持續咗幾日嘅上堂連環吹水之後，我哋隔離嘅同學都習慣咗上堂時候連環炮轟嘅騷擾，老師亦都唔再管住我哋，因為話完我哋兩個之後都係會回復原型，繼續吹到天荒地老。
-
但我發現楚翹每當小息一打鐘就會好快消失喺班房，但我都冇理會楚翹，因為我自己都趕時間爭取二十分鐘嘅小息時間去操場打波，同一班戰友「決一死戰」，呢班好波友同我打足四年，由中一開始，每個小息都跑落去操場開波，風雨不改。
-
有日上堂，我問楚翹點解每個小息都咁趕時間走，佢答我佢要去圖書館當值，因為圖書館好多人。但呢個情況完全係冇可能，因為成間學校都冇人睇書嘅，圖書館咁多年成日都係維持拍烏蠅嘅狀態。我讀咗呢間學校四年，我目測每日入圖書館嘅人數十隻手指都數得使，當然係我落操場嘅時候，路過圖書館嘅時候望一望啦！唔通我呢啲運動佬會入去咩？
-
冇錯，就係因為楚翹，我決定小息入圖書館睇下個環境。仆街，唔入唔知咩事，一入個心就有條刺，成班狗公竟然入晒圖書館去「睇書」，靜英英嘅圖書館竟然充滿人，個個都喺楚翹附近圍住，係咁借書同埋問嘢，務求有機會同楚翹交流。
-
「我而家嘅心情，好撚曳。」《同囚》呢套監獄電影嘅經典台詞正正表達我心情。竟然成班狗公圍住楚翹，我完全接受唔到。
-
突然，我喺茫茫人海見到遠處嘅楚翹好似向我揮手。
-
「文杰，你過一過嚟啊！」天啊！女神楚翹竟然叫我。
-
「做咩？」我成腦黑人問號咁。
-
「過嚟幫一幫手啊！呢度好多人啊！」楚翹揮手，叫我快啲去櫃檯幫手。
-
「吓！我唔識呢啲嘢㗎喎。」十世都唔入圖書館竟然要我幫手，我對圖書館嘅運作根本一竅不通，更加冇興趣。
-
「唔該你啦！得你一個可以幫我㗎咋！」楚翹嘅眼神祈求我嘅幫手。
-
「得啦！得啦！下不為例啊！」
-
雖然我完全唔識借書嘅程序，但初嚟呢間學校嘅楚翹已經係對圖書館瞭如指掌，佢一步一步咁教我點樣幫同學借書。不過我幫緊手嘅時候，好多同學都將未借嘅書擺返上架，我隱約仲聽到呢班同學講「楚翹女神都有仔嘅，嚟圖書館仲咩吖。」
-
「收皮嚕，日日去圖書館都徒勞無功嘅。」
-
一大班狗公魚貫咁離開追唔到女神之地，圖書館入面最後得返我哋兩個，同埋一啲真係睇書嘅同學。半分鐘前嘅熱鬧不再，成個圖書館即刻靜晒。
-
「頭先真係好唔該晒你，冇你喺度我都唔知點算好。」感恩啱先冇受朋友嘅誘惑去打波，唔係真係後悔莫及。
-
「使乜客氣，朋友有事梗係要幫手㗎啦！」望住楚翹個笑容，我犧牲寶貴嘅打波時間都值得嘅。
-
「你有需要嘅，我之後每個小息都陪你一齊當值囉！」機會擺喺眼前，無理由親手放棄呢個機會嘅。
-
「好啊！以後我哋一齊當值啊！」楚翹對笑眼真係好搶眼，連續搶走我嘅目光。
-
接住落嚟嘅幾個小息，我都搵藉口推咗朋友，決定同楚翹一齊去圖書館，費事再有一班狗公喺度阻住晒，當然我都可以同楚翹慢慢相處啦！
-
原本一個由單身女仔當值嘅圖書館充滿一班狗公圍繞，但當我持續咁陪楚翹當值嘅時候，圍繞楚翹嘅狗公已經越嚟越少，甚至得返我一個，可能佢哋都知道自己已經冇可能，楚翹已經名花有主，而呢個人正正就係我-儀表堂堂嘅古文杰。
-
一班死黨見我好耐冇打波，問我係咪去溝女，我當然耍手擰頭啦，如果追緊嘅時候失敗咪好老尷，話晒我都有偶像包袱㗎嘛，點可以令呢啲事發生呢！所以我一直瞞住班死黨，唔俾佢哋知我對楚翹有意思。
-
為咗追女神到底係咪可以放棄自己嘅興趣，我覺得可以，我為咗爭取時間同楚翹相處，我已經三個月嘅小息時間冇同班死黨打波，好彩嘅係因為楚翹每日放學都會好匆忙咁走，放學之後唔會留低當值，所以我都攝到時間練波。
-
有時少咗啲時間練波就係少咗，我發現自己啲球技冇隊友咁好，甚至開始有啲退步。同隊友打比賽嘅時候，我都察覺到自己啲技術開始生疏，隊友嘅新技術我都唔係好跟得上，隊友同我嘅關係都開始有啲疏遠。
-
喺呢個時候，我要做一個決定，究竟要可以陪伴我嘅好女朋友定要一班出生入死嘅隊友呢？
-
（待續 To be continued）
IG：chingchingstory