《前度超渡師》: 第五集-文杰失戀筆記（一）
送走水泡男之後，水泡男都係咁多謝我，令佢可以放低欣欣，我亦都好語重心長咁同佢講「記起易，忘記難」，呢六個字講就容易，做就真係好難。但我相信係個天俾毒男嘅一個新考驗，忘記欣欣，重新上路，搵到一個真心嘅女仔。
-
望見水泡男嘅故事，我都回想返我細細個都做過水泡男，但自己都完全唔知，最後係靠自己醒覺先知。
------
細細個嘅我，係一個好鍾意做drama嘅小朋友，所以由高小開始就係學校戲劇學會嘅成員。呢件軼事正正發生喺小六升中一嘅暑假入面。
-
小學當時搞緊一個大型嘅話劇表演，所以我即使畢咗業都要返嚟排戲。由於小學嘅時候，冇咩機會接觸其他年級嘅同學，所以都淨係同同級嘅人玩，但戲劇學會係可以認識其他年級嘅同學，而呢個女仔正正就係細我一級，如果冇戲劇學會，我都唔會識佢。
-
呢個女仔係我嘅師妹，細我一年，佢係一個萬人迷嚟，去到邊都有一大堆朋友跟住，情況就好似欣欣咁，所以我點解咁理解毒男，就係因為我都同佢一樣，經歷過啲差唔多嘅事。
-
當時嘅我對個女仔深深著迷，但我又唔敢同佢表白，不過好彩嘅係，排戲嘅時間正值暑假，學校冇午餐供應，要我哋排戲到晏晝，然後食個午餐再排戲，由於佢午餐約咗佢啲好姊妹食飯，於是我就約佢放學去食甜品，所謂嘅甜品就係老麥嘅新地筒，佢當然都會赴約，但係就連同排戲嘅同學。呢個係其中一樣嘢可惜，就係冇單獨約佢出嚟，而第二個可惜嘅位就係，我都唔敢問佢攞電話號碼再進一步溝通。
-
表演完結，正式離開小學，但仲未有一個戲劇學會嘅WhatsApp群組，而且咁多次嘅見面入面，我都係唔敢開口，所以我哋雙方都未有對方嘅電話號碼，我曾經以為我哋嘅緣份去到表演結束嗰下就到此為止。
-
點知有一日，我嘅電話突然收到一個嚟至一個陌生人嘅message。
-
「ILY！」
-
原來係啱先提及嘅女仔主動問我同班同學攞我嘅電話號碼，於是就展開我哋嘅第一次對話。傾傾下佢主動表達愛我嘅意思，我亦都向佢表達我鍾意佢嘅心聲，於是我哋就喺網絡上面「一齊」，我哋一得閒就傾偈，仲有屬於大家嘅暱稱稱呼對方。持續咗幾個禮拜嘅傾偈，終於我都鼓起勇氣話不如約出嚟，而佢當然都話好啦！
-
啊！ILY究竟係咩意思呢？當時對拍拖一竅不通嘅我完全唔識咩叫做戀愛，更加連點樣拍拖都唔識。
-
［愛是傻勁、是餘興、是神聖，替豐盛青春致敬。今天我們能答應，日後共別人談戀愛，要更有耐性。］
-
如是者，我哋就進行咗第一次約會，不過唔係去行街、睇戲、食飯，而係去圖書館做功課。嗰日嘅回憶最有印象係星期一，圖書館同自修室因為例行清潔而冇開，我哋就去咗體育館出面啲長凳到坐，啲功課就擺喺大髀到做，當時傾過啲咩，好老實真係唔記得晒，咁細個嘅記憶都真係好模糊。不過我肯定嘅係，呢次係我哋嘅第一次，亦都係唯一一次嘅約會。
-
［從前年齡太小，從前情人太少，難明瞭緣份的精妙。從前無聊玩票，成為無情玩笑，這一天彼此眼淚流是意料。］
-
隨著第一次嘅出街之後，我哋都展開無間斷嘅甜蜜文字對話，但之後都冇再約出嚟，呢個原因就係佢唔得閒，我亦都唔介意，體諒佢嘅忙碌。
-
可惜好景不常，去到暑假尾段，佢亦都搵到一個靚仔一齊，正式同我「斬纜」，當我搵佢傾偈嘅時候，一係已讀不回，一係求求其其咁覆就算。
-
去到呢個時候，我先漸漸醒覺，我係做咗一個水泡，我嘅用處就係攝佢空閒嘅時間。但我呢個時候都仲係覺得佢係我嘅女朋友嚟，我都想挽回我哋嘅關係，我每日、每晚、一得閒嘅時候就搵佢，但得到嘅都係虛無縹緲嘅回覆。
-
升到中一，睇佢Instagram見到佢同佢嘅新男朋友嘅「放閃相」，我先理解到我哋已經冇可能再一齊，自此之後我再冇搵佢，但我亦都放唔低佢。
-
［終於要放手，拒絕再回顧有哪一個做錯，試過最真實的虛榮，回頭又重要麼？］
-
去到中學第一件事，就係揀學會，我二話不說揀咗戲劇學會，除咗繼續實踐由細到大嘅興趣，亦都緬懷我嘅「初戀」，但呢個「初戀」同我分開咗個幾禮拜已經又同其他男仔拍拖，跟住過多幾個月，又再換多個男朋友。
-
［愛是澎湃，是忘我，是難過，再不是當初那個。多得愛情培養我，日後任別人離開我，也抬頭離座。］
-
咁多年嚟，我都係覺得佢係我嘅第一任，係我嘅「A1」，但隨著時間，所經歷嘅嘢越多就覺得佢唔係我嘅第一任，我哋連拖手都未拖過，錫、攬呢啲行為更加唔使諗。咁又點算有一齊過呢，最多只係友達以上，戀人未滿嘅關係啫。
-
［從前年齡太小，從前情人太少，才祈求離別的高調。從前傻傻合照，淪為模糊硬照，這一天彼此似路人被介紹。］
-
以前我會同人講，我係A1，但去到最近幾年，我會同人講我係A0。由A1變A0的故事，恐怕只有我一個人擁有了，呢個經歷，即使過咗咁多年，亦都令我印象深刻，第一次感受咩叫愛。
-
［日後各自紛擾，又換了目標，等到下個傷疤都結焦。一生人，難忘第一次，為幼稚男孩，狠心把初戀放低自然大個了。］
-
現在的我，應該成長了吧！哈！
-
至於ILY係咩？咪就係I Love You囉。
-
（待續 To be continued）
IG：chingchingstory