《前度超渡師》: 第四集-水泡男（三）
欣欣聽完我同腎仔簡單講述毒男嘅問題之後，從佢嘅表情睇到佢應該好驚訝，我估佢應該諗唔到原本諗住搵個水泡求其攝下啲空虛嘅時間，點知搵到個認真嘅人，相信佢亦都估唔到毒男會咁癡情。
-
「咁你哋係咪想我直接講我唔鍾意佢，淨係當佢係水泡？」欣欣充滿疑惑咁問。
-
「係。」
-
一個字，簡單嘅答覆，欣欣已經完全明白，話晒佢都請開人食檸檬，呢啲小事對欣欣嚟講易過食生菜啦！
-
或許你會問點解我唔會鬧欣欣嘅行為係一個賤人？但係你要知道，每個人都有自己嘅選擇，你可以做好人，亦都可以做壞人，隨你選擇。有時候，你遇到好人唔係理所當然，遇到壞人都唔係自己唔好彩。
-
［有啲嘢係你情我願，唔可以埋怨。］
-
即使我唔認同欣欣嘅做法，但我唔會同佢講道理，始終呢個係佢嘅決定。啊！我諗到有句你哋啲後生仔成日講嘅金句「條路自己揀，仆街唔好喊」。他朝一日，相信欣欣都有機會遇到一個壞人，呢個時候，佢咪會行返毒男嘅路，承受返毒男而家所受嘅苦況，咁欣欣就知道當初嘅佢係點對待毒男。最後會唔會變返個好人，定係變得更加壞，我唔知道，亦都唔想知道。
-
［有啲道理其實唔使講嘅，當你繼續經歷你嘅人生就會慢慢理解。］
-
同欣欣研究緊對策嘅同時，毒男都好準時咁到埗，聽欣欣講，今次係佢哋第一次喺學校以外嘅地方見面，係佢哋嘅第一次，亦都係佢哋嘅最後一次。
-
［最後一次，想念著你；最後一次，再度記起，只准今晚再度為你痛悲，在凌晨要淡忘。］
-
「歡迎兩位上到嚟『前度超渡株式會社』，相信大家都知今日上嚟嘅目的係咩，咁轉頭超渡嘅時候麻煩將你哋嘅手提電話及其他具響鬧功能嘅裝置關掉，或較為震動模式。超渡進行期間，可以進行任何口頭上嘅人身攻擊，但唔可以用拳頭及暴力解決，請問兩位有冇問題？」
-
每次正式超渡之前，都要讀呢段「客人須知」，情況就好似進行任何考試之前，試場主任都要不厭其煩咁讀「考生須知」。
-
望見兩位都冇問題，超渡正式開始。
-
「其實你有冇鍾意過我？」毒男率先開口問。
-
「一啲都冇，一直對你一啲感覺都冇，係零感覺吖！」欣欣亦都唔轉彎抹角，直接令毒男死心。
-
「咁你點解要呃我，欺騙我感情。」毒男釐清事實之後，開始眼濕濕。
-
「你好呃囉！你呢啲毒男最易呃㗎喇！」欣欣都開始唔耐煩，但作為聽眾嘅我都估唔到欣欣會講得咁直接。
-
「我當時見你當時唔開心去先開解你，點解你要咁對我吖！」毒男開始崩潰，雖然事實就擺喺眼前，即使連佢嘅愛人，欣欣都親口承認咗未肯接受到。
-
「我真係諗住搵你做下水泡，聽下我講嘢，純粹搵個樹窿，完全唔想同你有下一步。好心你照下塊鏡睇下自己咩樣先啦，樣又唔得，衣著唔得，性格，唔使我多講啦！我Block咗你之後又開其他account搵我，你冇嘢呀嘛，慳啲啦！」欣欣開始火爆，遠超我嘅預期。
-
毒男嘅樣，真係唔靚；佢嘅衣著，真係唔掂：佢嘅性格，我唔清楚，但我唯一清楚嘅係毒男係真心愛欣欣。呢種愛嘅程度係旁人沒法比，毒男完全唔介意犧牲自己嘅一切陪伴欣欣，不過欣欣嘅心態係「有人關心我呀！好囉。」
-
［維護著這夢幻，承受著這一身感嘆，敢愛並未怕難，這晚很藍，同偕共老想像漫談。］
-
「你知唔知我有幾鍾意你？我要等你每晚同我講早唞我先肯瞓覺，你每次搵我，我都永遠秒回你，當你最需要我嘅時候，我永遠都在線上等你。」毒男講出佢嘅心聲，因為佢真係好愛欣欣。
-
［這段憶記，刀般鋒利，寄望痛傷有個限期。儘管想到有人為你蓋被，抓緊放手的，勇氣。］
-
「其實我真係唔鍾意你，一啲都唔鍾意你，你唔好FF咁多啦！係咁，你以後都唔好再搵我，無論網上定喺學校。總之我唔鍾意你。」欣欣都講出佢嘅心聲，直接同毒男攤牌。
-
旁人講嘅嘢，就算講一百句定一千句都冇用，但你著緊嘅人，即使一隻字，都已經上晒心。我覺得毒男經過啱先嘅對話都已經明白晒欣欣嘅心意。
-
「好多謝你，我終於知道你根本對我冇感覺，多謝你俾機會我鍾意你。」毒男雖然啱先經歷過直插心底嘅傷心，但佢都可以保持笑臉，對住佢所愛嘅人。毒男係時候要放手，忘掉曾經愛過的欣欣了。
-
毒男嘅動作同我細個嘅時候一樣，自己其實都唔知自己點解鍾意個女仔，總之見到個女仔笑，自己無論獻出幾多都冇問題。
-
［就算獻出比收成多，也是我的錯。］
------
毒男呢個故事望落好似個女仔傷害咗毒男，但其實毒男所學到嘅嘢，係比佢成功同欣欣拍拖更多。
-
或許你想知究竟毒男學咗啲咩？咪就係學咗：喺一段關係入面，男仔唔可以淨係奉承佢嘅「女神」，盲目咁為佢付出，而係要用朋友身份，唔應該係女皇與奴才嘅關係。
-
相信每個男仔都一定經歷過呢個階段，分開嘅時候，係非常痛苦。但到若干年後，攞返件事出嚟講，咪又係一笑而之。
------
獻給曾經當過水泡男的你，即使你分開後對那女孩依依不捨，但千萬別因為一棵樹，而放棄整個森林，這個世界，還有很多比她好的女孩等你來發掘，或許這個女孩就是你現在最親的人，可能是你的朋友、同學、甚或同事。不過謹記「己所不欲，勿施於人」。
-
（待續 To be continued）
IG：chingchingstory