《前度超渡師》: 第六集-恐怖前男友（一）
夜雨凍，雨點透射到照片中，回頭似是夢……
-
唉！呢排嘅天氣一啲都唔靚，日日都係咁落雨，搞到電腦又播有「雨」字嘅歌，幾時先可以播返啲晴天嘅歌吖！
-
「唔該！請問呢度係咪『前度超渡株式會社』？」一個素顏嘅學生妹走近，身上噴咗一浸桃味嘅香水，發出淡淡嘅果香，令我心入面嘩咗一聲。如果呢位女學生同都係學生嘅欣欣比較，呢個女仔肯定完勝欣欣一百倍，一套普普通通嘅校服著喺佢身上都著得維肖維妙，真係「窈窕淑女，君子好逑」啊！
-
「係，歡迎光臨『前度超渡株式會社』，我係你嘅前度超渡師，請問你係咪有前度問題困擾需要由我去幫你超渡呢？」突然之間有個靚女出現，搞到我都呆咗呆，霎時之間唔知點回應好，唯有揼返句經典開場白鎮鎮驚先。
-
「我有個前度係咁煩住我，我想佢以後唔再搞我。」妙齡少女睇嚟遇到嘅煩惱，睇怕要我呢個大哥哥俾返啲溫暖佢喇！
-
「唔使擔心，放心交俾我啦！」當然我都冇行前俾溫暖佢，大家唔使驚，我唔係變態嘅，我雖然冇女朋友，但都唔會咁飢渴嘅，冇理由連一個學生妹都啱。始終，我個心入面仲有一個佢係未完全放低。
-
我伸手示意個女仔可以坐低，個女仔溫柔坐低嘅動作搶走晒我嘅視線，我望到入晒神，眼都唔眨咁望住佢坐低。
-
「做咩係咁望住我嘅？我條裙有事咩？」佢見我望到入晒魂，忍唔住開口問。
-
「無事，無事。你可以講下你同你前度嘅故事，睇下我可以點幫你。」好彩佢一開口，拉返我個靈魂拉返嚟，不過我都有啲驚轉頭「超渡」嘅時候會掛住望佢而冇聽嘢。
------
（靚女視覺）
-
我叫星瓊，我係一個中五學生，我同我嘅前度衍皓分手之後，衍皓就一直喺我背後講我話壞話，原本我認為分手嘅原因就係因為衍皓對我淡咗，再加上衍皓同我嘅好朋友講話係佢自己一腳搭兩船，佢為咗唔再傷害我先同我分手。我都好開心，佢知道自己唔啱就淡然離場。
-
但分手冇耐衍皓都有搵我，想再我再續前緣，我亦都衰心軟，始終心裏都有佢嘅位置，當時仲未確實咁放低佢，都有啲啲愛佢嘅感情，而再同佢一齊。不過我哋好快又分手，原因又係同之前一樣，又係因為佢又花心而分手。
-
即使過咗第二次分手之後，衍皓隔咗幾個月之後又再搵我，又想一齊返。唔知係咪每個女仔都覺得憑著自己少少嘅力量可以改變一個壞男仔，而我自己就係一個活生生嘅例子，一而再，再而三咁相信自己可以改變一個玩開嘅賤人。
-
我又再同衍皓一齊，冇錯，我又再同佢一齊，呢次係我哋嘅第三次拍拖。
-
［握手，相識了便有盡頭。拖手，拖垮了最好朋友。讓情感，站在十字的街口，前路便沒有。］
-
而呢次嘅分手，都係因為佢對我心淡，再加佢又有第二位女朋友而分手，即使衍皓係咁對我，我都係咁鍾意佢，每次衍皓再搵我，我亦都因為衰心軟而再同佢一齊。但今次，我唔會再原諒佢，一世都唔原諒佢，以後佢再搵我，我都唔會再同佢復合。
-
［分手，簡單說為了自由。揮手，以後無以後。讓兩手，不觸碰更加不朽，葡萄別熟透。］
-
原本衍皓同我嘅好朋友講因為佢自己一腳搭兩船而分手，但原來呢啲通通都係大話嚟，淨係欺騙我嘅感情，想同我再復合。可能你會問點解我會知，因為我第三次同衍皓分手之後，識到一個隔離班嘅女同學，而呢個女同學係同衍皓有啲熟嘅。呢個女同學同我講，係我一腳搭兩船，衍皓先唔要我，我聽完之後覺得好詫異，點解我之前喺我好朋友嗰度聽嘅版本同呢度唔同。
-
自從我知道咗衍皓誣捏我嘅事實之後，我就知道全世界除咗我之外，冇人知道事實，大家都當喺衍皓所聽到嘅就係真相。
-
除咗衍皓同其他朋友講我嘅謠言之外，佢仲喺學校夾埋其他朋友整蠱我，一齊欺凌我，佢會聯同佢啲賤格男同學一齊搞我，有時特登整濕我個書包、有時特登收埋我啲嘢，筆袋、書都俾佢哋收埋，我成日以為自己唔見嘢而要嘥錢買返。佢哋一得閒就係咁搞我，其實我都係想開開心心咁返學啫，點解連咁少嘅事都做唔到啫！
-
不過好彩我最近識咗一個好朋友，呢個朋友就係同我講衍皓周圍講我蜚語流言嘅女仔，慶幸嘅係佢肯聽我嘅心事，分擔我嘅感受。
-
即使有朋友肯聽我嘅心聲，但唔知點解，隨著呢件事，我發現自己開始少咗笑，有時又好似抑鬱咁，傷心得嚟而乜都唔想做。
-
我知道要我放低佢係放唔到，我唔係要忘記佢點對我，我係想佢重新經歷一次我行過嘅路，知道俾人飛再俾人搞嘅感覺係點。
-
（靚女視覺完）
------
靚女視覺去到呢度先，喺呢個時候，睇緊嘅你可能覺得點解星瓊唔同老師講自己俾人欺凌呢？就係因為如果星瓊將件事告發俾老師，老師跟進咗，我相信啲衍皓同佢啲朋友一定會報復，呢種報復唔係簡簡單單嘅報復，而係變本加厲。喺星瓊嘅角度嚟睇，即使告咗俾老師聽又點，倒頭來搞返嘅都係自己，告又係死，唔告仲死。
-
但喺我角度嚟睇，任由女仔繼續俾一班男仔恰，作為男人嘅我，實在睇唔入眼，堂堂一個男人點可以欺凌一個女仔，我一定要令啲狗公知道，女仔唔係攞嚟恰，而係攞嚟錫嘅。
-
「我用我嘅名義應承你，我一定會令佢受返你行過嘅路，一定痛多一百倍。」呢個係我對星瓊嘅承諾，我唔可以改變星瓊嘅記憶，但我唯一可以改變嘅就係星瓊嘅未來。
-
（待續 To be continued）
IG：chingchingstory