《前度超渡師》: 第三集-水泡男（二）
毒男始終都唔肯相信個女仔，即係佢口中欣欣係唔鍾意佢嘅。睇嚟我要直入佢嘅內心，開門見山咁同毒男解釋清楚。
-
「你哋平時有冇喺學校一齊傾偈，放學之後有冇拍拖吖？」我問。
-
「冇吖！欣欣話唔想喺學校拍拖，而且放學之後佢好忙㗎，佢淨係夜晚同我傾偈，佢話我哋嘅關係在心中就好足夠㗎喇！」毒男認真咁答。
-
嗱！睇到呢度嘅你都覺得毒男應該係做咗水泡，但毒男被戀愛蒙在鼓裏，總係覺得自己係欣欣嘅正印寶寶。
-
老老實實，我真係好想幫佢，並唔係因為我嘅職責，唔係因為我收咗佢錢而要幫佢解決問題，而係，我都曾經經歷過做水泡：一種你當人哋係寶，但人哋係當你係草嘅感覺，係一啲都唔好受，但係偏偏冇辦法忘記。
-
「但欣欣有日突然粒聲唔聲就封鎖晒我所有嘅聯絡方法，返到學校又唔同我傾偈，我哋傾咗咁耐，啲回憶一下冇晒喇！」
-
講講下，毒男終於都忍唔住自己嘅無奈，為自己所認知嘅「前度」留下一篤眼淚。
-
毒男回想起之前同欣欣嘅「曖昧」，其實都係自己一個嘅假想，每晚甜蜜嘅對話，每次叫「BB豬」嘅暱稱，每次話想放學之後約行街嘅遐想，每次幻想打破文字對話嘅假想，每次想同欣欣一齊嘅夢想，都隨著現實一一失去，但我相信，呢種愛就係毒男對欣欣嘅「幻愛」。一種付出但係唔計較回報嘅愛。
-
［埋藏著這夢幻，埋藏著這浪漫，明明我已溫柔，愛卻很難，流連樂與悲之間。］
-
究竟欣欣算唔算係毒男嘅女朋友？喺毒男嘅眼中，欣欣係佢嘅女朋友，即使冇一齊出街、冇一齊食飯、冇拖過手、冇錫過，淨係透過網上傾計，都算係拍拖。但喺欣欣嘅眼中，毒男根本唔係男朋友，美如其名都係叫靈魂伴侶，換返而家後生仔嘅用語即係「蘇媚」soulmate，唔好聽咪叫水泡囉，反正都係攝下時間，填補分手嗰一剎那嘅空虛。喺欣欣嘅角度諗，即使毒男唔靚仔又有咩所謂，反正有人錫自己，毒男又會奉上自己，殷勤獻禮，最多自己咪派下軍糧，簡直百利而無一害。
-
［立場嘅嘢，其實睇下你企喺邊度嘅啫，如果換位思考，或許結局就唔係咁。］
-
再係咁落去，毒男會對個女仔念念不忘，因為始終係佢所謂嘅「第一任」，難免會放唔低，而且佢哋根本都冇一齊過，淨係毒男嘅一廂情願，只有毒男係覺得佢哋係一齊，可惜，毒男始終都係唔肯唔信我講嘅嘢。正所謂「解鈴還需繫鈴人」，一定要搵到欣欣先可以解決到個問題，令到毒男可以徹徹底底咁放低欣欣。
-
繼續由我把口講出上述嘅現實已經冇意思，都係嘥我哋兩個寶貴嘅時間，於是我送走毒男，俾啲時間佢一個人冷靜下，消化下我所講俾佢嘅嘢，然後我聯絡我嘅助手-腎仔叫佢上嚟同我一齊商討對策。
-
「喂杰哥，有咩大case要我跟進吖！」
-
腎仔-全名張頌賢，佢係我嘅老死，亦都係我嘅得力助手，佢主要嘅職責就係幫手度橋同叫外賣，當然仲要攞埋外賣啦！明明一個人都可以做到嘅事又點解要多一個助手啦？就下因為愛啊！腎仔雖然識咗唔係好耐，但佢都係我嘅老死，我哋老友嘅程度係可以一條底褲兩份著，一盒飯兩份食，唯獨唔可以一條女兩份溝。至於腎仔又係點識，唔話俾你聽住，我可以好肯定咁話俾你聽，我哋相識嘅過程係估你唔到，你聽完之後會笑到碌哋嘅。
------
同腎仔簡單咁講毒男嘅處境之後，我哋就開始諗辦法點樣完成超渡，然後透過互聯網嘅起底，搵欣欣嘅身世，搵到之後就開始聯絡欣欣，希望佢可以上嚟幫手，解脫毒男嘅煩惱，究竟我哋平時點樣請需要幫手「超渡」嘅另一半上嚟呢？其實都係一個字「錢」，每單收費入面，都有一部分係用嚟搵客人需要嘅另一半上嚟，平時冇錢又點可以請到咁忙碌嘅香港人吖！
-
說時遲那時快，欣欣已經答應我哋嘅要求，肯上嚟「前度超渡株式會社」幫毒男超渡自己。約好欣欣之後，同時都聯絡咗毒男，可以上嚟進行超渡。
-
未試過超渡前度嘅你可能會好奇，成個超渡過程係點嘅呢？其實係好簡單，我哋首先會搵好雙方，約實一個時間上嚟「前度超渡株式會社」呢度，我哋嘅崗位就好似一個中立國，俾個地方佢哋去傾訴，令當事人可以忘記佢嘅前度。與此同時，我哋都需要當事人嘅另一半去幫手，先可以令件事可以事半功倍。所以通常約實第二次見面嘅時候，當事人嘅另一半（欣欣），係會比當事人（毒男）約早一個鐘上嚟，首先可以避免喺街上撞到然後一齊上嚟嘅尷尬，而且又可以同當事人嘅另一半傾下有咩方法可以直入中路，精準咁直插當事人問題嘅深淵，令到當時人可以放低前度。
-
［一千個假想結局，怎可預告，願逃入夢境，錯或會變好，醒了是新的清早。］
------
幾日後，終於都到佢哋超渡嘅日子，首先欣欣都好準時咁上到嚟，雖然之前都略略哋睇過佢張相，佢個樣好易令人記住，因為真係幾靚，望到佢真人更加不得了，淡淡嘅妝容加上前衛嘅衣著令我望得好入迷。
-
「杰哥，唔好再昅女喇！」
-
腎仔嘅出現令我回神，專心做好超渡嘅工作。問心嗰句，欣欣真係好靚，唔怪之得毒男會鍾意佢，可惜欣欣嘅性格，相信大家都知係咩啦！但即使佢嘅性格係點，我哋都要堅持返自己操守，繼續進行超渡嘅。
-
［如果我係毒男，我相信我自己都會對欣欣沉船。］
-
（待續 To be continued）
IG：chingchingstory