《前度超渡師》: 第二集-水泡男（一）
做咗呢行都有好幾年，接觸到嘅故事多不勝數，但呢個故事一定係我聽得最唔知點樣形容嘅一個故事……一個做人水泡但自己完全唔知嘅故事。
------
下雨天總掛念從前，球場上那可愛片段……
-
每當落雨嘅時候，電腦嘅播歌程式都自動播一啲關於落雨嘅歌，好天嘅時候就會播啲輕鬆啲嘅歌，都唔知部電腦係咪同天文台係朋友嚟，成日都知出面嘅天氣。我好肯定呢部唔係普通嘅電腦，應該係天氣之子嘅朋友-天氣之電腦。
-
當呢首緬懷友情嘅首本名曲去到副歌嘅時候，有個學生仔嚟咗。佢唔係一般嘅學生仔，佢係一個毒到冇得再毒嘅毒男，點解我會知，因為一睇衣著就知得一清二楚，軍綠色格仔T-shirt，橙色短褲，再加一對好似拗柴之後包紮完嘅大波鞋。
-
「歡迎光臨『前度超渡株式會社』，我係你嘅前度超渡師，請問你係咪有前度問題困擾需要由我去幫你超渡呢？」
-
都話呢句係我嘅例牌開場白嚟，每個客人嚟到都係咁講㗎喇！就好似你每次去到茶餐廳咁，啲伙記永遠先問你幾位，然後坐低咗就問你食咩，唔會變㗎！
-
「我呢……我想超渡我嘅前度吖！你……你係咪可以幫我㗎？」
-
第一眼望住呢個毒男，真係諗唔透何解毒到咁都可以有前度，我相信佢咁嘅樣都可以有女朋友，呢個世界再冇人單身。上述嘅嘢，當然全部在心中講啦，點會咁大聲講客人不是呢！正所謂「客人永遠是對的」，呢句相信係各位做服務性行業都明白嘅道理嚟。
-
「當然係啦！我哋前度超渡師一定會幫你解決問題㗎！」
-
係咪好假呢！我哋做前度超渡師就好似社工咁，一定係要先氹好個事主先㗎喎，如果唔好好氹好，陣間發晒癲咪大鑊囉。我都係打份工㗎咋。雖然我嘅訴求唔係想返工，但我嘅訴求就係唔想聽啲咁Q無聊嘅故事囉！
-
「我個女朋友仔……唔要我吖！」
-
「係嘅！我明白嘅，不如你講下你哋發生咩事吖！」
-
對住啲毒男，真係想叫佢快啲入正題，轉頭講到離題，阻住我收工就唔好啦！
------
（毒男視覺）
-
我係一個動漫迷，最鍾意睇動漫，平時冇嘢做就匿喺屋企睇動漫，唯一出街就係去買模型同埋去女僕cafe……
-
相信睇到呢度，都再冇睇落去嘅價值。老老實實，我對一個毒撚嘅生活，完全冇興趣。（佢已經唔再係我口中嘅毒男，直接升級做毒撚。）
-
算算算，都係俾返個上帝視覺你哋啦！再聽呢個毒男講嘢會悶到瞓覺㗎。
------
（上帝視覺）
-
「十二歲起不再共女生玩，靠幻想左手起晒繭。」呢二十個字連標點已經可以形容佢啱先冗長嘅前設，啲咩咩動漫情節，完全可以delete晒嘅。
-
冇女咪冇女囉！我到而家都冇女啦！咦，故事去到第二集都未介紹自己㖭！小弟叫古文杰，芳齡二十五，係一個溝唔到女嘅可憐蟲，每晚唯一嘅活動就係上一上交友app睇下有冇啱心水嘅女仔可以傾下偈，做下朋友，當然我都唔介意再發展多步，成為女朋友啦！如果有興趣成為我女朋友嘅，歡迎跟住上集嘅地址，去到「前度超渡株式會社」搵我啦！
-
繼續返去毒男嘅故事先。佢單身咗咁多年，但唔知點解突然有個女仔埋身喎，就好似上天雖然關了一道門，不過總會為你打開一扇窗嘅。可惜呢個窗就係一扇壞咗嘅窗囉。
-
毒男喺最孤單、最空虛嘅一個晚上，突然收到一個隔離班女同學嘅DM，話可唔可以做一陣樹窿，作為一個女性絕緣體嘅佢當然係發晒癲，任何時候都秒回啦。
-
「Hi靚仔，我今日有啲唔開心吖！你可唔可以做陣樹窿先吖？」
-
初戀呀！我要初戀吖！一個開始俾戀愛沖昏咗頭腦嘅毒男開始慢慢浮現。
-
「梗係冇問題，我非常之樂意咁聽你嘅故事。」
-
開始呢個水泡男嘅故事之前，我簡單咁講述下呢個女仔嘅背景先。呢個女仔公認係毒男學校嘅級花，我略略睇過呢個女仔嘅相，都真係好靚，唔怪之得毒男會狗公上身。但最奇怪嘅係，佢哋兩個喺學校係從來都冇傾過偈，淨係純粹知道學校入面有對方嘅存在，一啲交情都係冇嘅。
-
「我今日失戀吖！而家好傷心，瞓唔到。」
-
毒男見到個女仔咁慘慘豬，即刻大愛上身，話晒佢都未試過被女仔撩，除咗問功課或者搵著數之外，喺旁人眼中，呢位毒男就係現今人口中嘅FWB，即係friends with benefits。
-
「唔緊要，你即管同我講啦，我一定會幫你解決問題嘅。」
-
女仔嘅第一步成功，終於都開始分享佢之前同佢前度嘅故事。
-
［當天這道門合上，冰箱裏沒人在雪中送碳，呼吸缺氧。］
-
呢個女仔同佢嘅前任男朋友拍咗一年半，喺上個月先分手，之後就搵毒男訴苦。毒男就覺得呢個係機會可以拍拖，之後就社工上身，開解個女仔。
-
然而，呢個女仔並唔係啲善男信女，而係一個換男朋友嘅次數多到十隻手指都數唔晒嘅女仔，呢個女仔係鍾意拍散拖，淨係鍾意一段曖昧加熱戀期，當佢對佢嘅男朋友再冇感情嘅時候就會分手，之後搵第二個，喺未搵到第二個合適嘅人選之前，就搵啲人做住水泡先，繼續享受俾人寵愛嘅時刻。
-
如果你問我，究竟個女仔有冇對毒男有冇感情，我可以用我一世嘅單身嘅重注同你賭，肯定冇任何感情。純粹當毒男係水泡。
-
「冇可能，欣欣明明仲好鍾意我，佢當我係佢老公仔㗎！」
-
（待續 To be continued）
IG：chingchingstory