《前度超渡師》: 第一集-序章

「若覺得第一位最愉快，為何上一位不釋懷，誰亦在反覆錯愛之旅捱大。沒法想下一位的生涯，寧願能白首，還是罷手。彷彿怕，無憾便老得很快。」《下一位前度》-林家謙
-
前度，每個人都會有。但當你分手後，就唔會再特登同前度見面。如果俾個機會令你重新面對前度的時候，唔知道你又會有咩反應呢？究竟係憤怒、樂觀定抑或係慨嘆呢？
------
「歡迎光臨『前度超渡株式會社』，我係你嘅前度超渡師，請問你係咪有前度問題困擾需要由我去幫你超渡呢？」
-
正如上文所見，我係一位前度超渡師。呢句亦都係每位客人入到嚟聽嘅第一句，當然我都知道，嚟得嘅客人當然有前度嘅煩惱㗎啦，唔通入嚟問廁所喺邊咩？不過你知道，學劉德華話齋：「今時今日嘅服務態度，唔夠㗎！」
-
而前度超渡師嘅職責，顧名思義就係幫人超渡前度。所謂嘅「超渡」並唔係實體上類似法師用桃木劍驅鬼嗰種超渡，而係似心理醫生一樣，從心靈上解決當事人因為前度帶嚟所受嘅苦惱。
-




有啲人分手後，會對前度產生一種依依不捨嘅感覺，就好似一下子失去咗人生目標咁。亦有啲人係帶住憤恨分開，恨不得前度即刻仆街死。不過，現實唔係淨係得黑與白，亦都有灰色地帶嘅，就好似有人分手之後會好欣慰、好慨嘆，更加有人想復合但開不了口，就由我去超渡前度，再次成為正印。
-
［就是開不了口，讓她知道。我一定會呵護著妳，也逗妳笑。］
-
而我嘅角色就係化解上述由於前度而衍生嘅感情問題，等有問題嘅情侶可以徹徹底底放低曾經傷害過自己嘅前度，重新投入另一段戀情，又或者令到雙方放低對彼此嘅仇恨，俾個機會佢哋面對面認真傾下偈，了解同解決自己嘅問題。
-
每位客人入到嚟都要簽一份同意書，呢份同意書就係要客人知道超渡前度失敗或許會放唔低前度，嚴重嘅仲可能帶嚟更加深層嘅罪孽與內疚。
------
『前度超渡株式會社』-前度超渡條文
-




1.當事人需攜同與前度的故事前往「前度超渡株式會社」，由前度超渡師解決。
-
2.超渡前度時，可作口頭上的人生攻擊，但不可以使用暴力解決。
-
3.超渡個案或許有失敗，可能會帶來更傷痛的後果。
-
4.當值的前度超渡師擁有一切決定權，一切後果由當事人負責。
------
呢度嘅條文雖然唔多，但已經可以保障到所有前度超渡師嘅工作，亦都令到當事人知道，如果「前度超渡」失敗嘅重要性，不過入得嚟嘅都唔介意呢啲所謂嘅規矩啦！
-




最後我講下我間鋪頭嘅位置，我間鋪頭就係喺砵蘭街167號C座，黃色光管招牌，寫住「青春玉女波后」……隔離嘅噏耷鋪頭，歡迎帶埋你嘅前度上嚟超渡啦。
-
一般嚟講，每次嘅超渡療程係兩次起計，第一次係當事人上嚟講低佢嘅苦況，然後我就會用幾日嘅時間去聯絡前度，最後就會兩個一齊進行一次甚或兩次以上，視乎情況而定嘅「超渡」。至於當事人嘅前度點解會肯上嚟？唔好意思，呢個係商業秘密，暫時唔可以向大家透露住。
------
成為一位專業嘅前度超渡師，唔需要任何高學歷，唔需要有任何經歷，但需要有一顆中立嘅心，唔會偏幫任何一位事主，同埋承諾會保密佢哋所面對嘅問題，唔可以喺任何地方透露，如果前度超渡師犯咗上述嘅錯誤，將會被炒魷魚，並以後唔可以再做前度超渡師，甚至唔可以再幫襯位於世界各地「前度超渡株式會社」嘅任何服務。之前嘅條文就係保障前度超渡師，而家嘅條文就係保護當事人，保障佢哋嘅私隱。
-
至於我係點樣加入呢度，成為前度超渡師嘅一員，繼續睇去咪知！喺講自己成為前度超渡師之前，梗係講下之前受前度困擾嘅故事啦！
-
但我作為前度超渡師唔係要保密客人嘅資料嘅咩？但古語有云：「食住花生笑呵呵，睇人仆街最開心。」當然，我都會用化名去分享佢哋嘅故事啦！
-
［喺前度超渡株式會社，一切嘅秘密都係公開㗎！］
-
（待續 To be continued）
-
呢個係澄澄故事台全新嘅故事《前度超渡師》，希望大家可以多多支持，故事連載時間同之前一樣，都係逢星期三同星期日發佈，如果有特別調動就會喺Instagram同通知大家嘅。




-
最後祝大家情人節快樂，未出pool嘅早日出pool，有拖拍嘅就祝你長長久久，最後借個位祝自己都可以拿拿淋有女朋友啦！

IG：chingchingstory