我鍾意咗我親生姐姐，但係佢已經有男朋友？！: 女神候補篇（11）

轉眼間到咗放學，我喺學校門口等Nana同小櫻嘅同時，收到封匿名短信，上面寫住..

「親愛嘅月之騎士，言歸.. 正傳，我講咗話會幫你…攻略Nana。」

見到呢堆中二病到爆炸嘅發言，我就知一定係不知火嘅所作所為。其實我一開始都唔想比電話佢，不過如果係來自天才嘅頭腦，的而且確係有可能可以教到我多啲溝女嘅tactics。

「有屁快放，你無端端迫我比電話號碼你，如果再廢嗡，即刻block7你。」

我要應付Nana同小櫻兩個已經攰到嘔，如果再加多個奇怪人，我呢個月就大安旨意唔使瞓。





「Nana係一個嚴重嘅動畫迷…」

佢講完之後我即刻記起早兩日喺街撞到Nana同小櫻嗰陣，佢哋仲討論緊邊套作品好睇啲，尤其Nana仲係cos緊唔知邊個角色。

「Nana其實一直都…承.. 受住…好大嘅壓力…. 所以…先可以靠睇動畫…去抒壓。而..cosplay更加令佢…可以赤裸裸咁…表達自己.. 嘅情緒。」

「你又知呢啲嘢嘅？」我好奇問佢。

「佢…咁出名，所以我之前.. 一直有調查關於佢…嘅嘢…仲有好多好多佢嘅甜，我..都瞭如指掌。」





我見到佢打嘅內容就打咗個冷震，如果溝著個咁嘅極品，命都短幾年。

「你…宜家…我覺得可以…. 親手整一套cos服比佢…相較出邊現繩買，自己定造嘅會比較…精準，而且…. 包含名為心意嘅橋墚會更容易傳達到…佢嘅…籠牢。」

但係我從來都冇縫過衫，更加唔使講cos服呢啲咁勺轉嘅衣著。已經唔係關乎柒唔柒，而係有冇呢個能力。

「我…陣間再講..」

因為聽到小櫻佢哋把聲，我好快咁收埋部電話，費事佢哋問長問短。





==

好快又到左夜晚，我問咗問Nana聽日有冇野做，如果無，聽日可唔可以陪我出一出去。咁樣就可以知佢鍾意邊套動畫，同埋問下關於cos服材料嘅問題。

「聽日嘅話，我冇嘢做呀。想點。」

佢一路嘆咖啡，一路揭住新一期JUMP，完全冇乜點理我。不過正常嘅，我平時打機都唔想有人阻鳩住，何況係毒到出水嘅佢欣賞緊最新連載嘅作品。

我係咁二望左下佢睇緊啲咩。

「哇，排少出左新作咩？」

佢一聽到我講排少就停低揭書。

「乜你有睇排少架咩？」





「有.. 呀」

「你鍾意邊個男角呀？」Nana勁開心咁問我。

「我梗係鍾意…月島..」

我講完月島之後佢即刻忍唔住吐嘈咗下：「唔係掛，你竟然會推佢，應該係夢女先會啱架喎。你同小櫻嘅taste真係…」

咁佢串完我之後，多少有啲唔服，我又問返佢like邊個。

「我梗係鍾意及川さん，浪川配佢配得好好，完全係perfect match，遊刃有餘嘅王者形象，加上軟萌嘅霸道，絕對係女仔嘅夢中情人。」

「我又唔係咁睇，內山昂輝嘅沉寂同月島嘅自負係最強嘅組合。尤其係打白鳥澤最後大嗌嗰下，將月島一直以嚟嘅情緒由零爆到上一百，絕對係排少最經典場面之一。嗰幕嘅震憾甚至比得上櫻木佢哋挑贏澤北。」





「傻的嗎？如果係講經典，點會唔係打伊達工業…雙人組合第一次打爆鐵壁銅牆！」

唔知傾左幾耐，我哋都覺得好攰…

「啊…好耐都冇試過同人傾動畫傾得咁爽。」

「我都係呀…哈哈」

我哋望住大家忍唔住笑咗出聲，然後隔咗陣我個肚就「咕～咕～」咁響。

「你休息下啦，我去煮個麵比你。」Nana好快就行咗入廚房煮嘢食比我。扔抵我一個喺廳度。空無一人嘅空間，牆上嘅掛鐘發出「滴達滴達」嘅聲音，更顯得出我嘅寂寞。

其實Nana真係一個好好嘅女仔，雖然平時有啲大小姐脾氣、個人又暴力，但係內心會為咗守護其他人而戰鬥，會為咗朋友而出風頭。仲有會喺夜晚為你送上一碗熱辣辣嘅公仔麵，我用魔眼掃瞄咗下Nana，見到佢嘅好感度由之前20/100上升至28/100。






幾分鐘後，Nana就為我獻上咗碗美味可口嘅出前一丁。一碗簡簡單單嘅麵，因為少女嘅溫柔令我覺得好幸福。同之前昂貴嘅龍蝦牛扒唔同，呢碗公仔麵係出自一個女仔對你嘅體諒。明明已經凌晨一點，但係聽到你肚餓都唔會嫌你煩，而係即刻諗辦法去填滿你個胃。平時高傲嘅性格，但對住你就口不對心咁照顧你，就好似一塊黑色布上面染上只屬於你嘅白色污點一樣。

我再一次問佢聽日得唔得閒，佢今次嘅答覆終於同頭先唔同。

「聽朝九點…唔好比小櫻知。」

講到我地兩個瞞住小櫻偷情咁，但好感度就由28上升至29…. 所以話女仔幾時都係口嫌體正直。