我鍾意咗我親生姐姐，但係佢已經有男朋友？！: 女神候補篇（10）

我同小櫻好快咁趕去同Nana會合，不過礙於頭先嘅情況，我哋兩個始終保持一言不發。

「真係唔好意思！我會重新審視一下我校嘅學生。身為學生會會長竟然因自己疏忽令到非本校學生受傷。請你接受我嘅道歉。」

宜家喺我面前躹躬，表示歉意嘅係Nana嘅同學，亦係呢間學校嘅代表—Cynthia。

咁單嘢根本唔關佢事我梗係唔會怪佢，而且又點會估到兩個大男人對一個女仔出手。所以我即刻叫佢起返身，唔好再blame自己。

「係…的確今次件事錯不在你，而且你又唔打得，就算你頭先真係出手，分分鐘比佢哋打埋一份。btw，你中文幾時講得咁好架，我記得入學典禮嗰陣仲係好大鄉音架。」





Nana好順理成章咁打圓場，輕輕咁帶過左件事。應該話不愧係佢，用半笑話嘅語氣就將現場氣氛拉返正常。

「你唔好笑我啦～係喎！我睇咗上期時裝周刊封面，你又見報，勁啦。今次仲唔…話說平時唔見你同男仔一齊返學，唔通佢就係傳說中嘅男朋…」Cynthia望住我講。

「點會呀，就憑呢隻野又點會係Nana男朋友呀，佢就想呀…」「我絕對唔會比佢做Nana男朋友囉！」

小櫻叉住腰，少少發脾氣咁喝住Cynthia。

Cynthia好似發現新大陸咁「噗」咗吓谷住無出聲，但係雙眼已經明示佢忍笑忍得好辛苦。





Nana見狀亦少少面紅咁表示唔係。

「好啦好啦，去上堂啦陣間再講啦！」Cynthia對一對錶後拉走左小櫻，留低咗我同Nana兩個係走廊度。

==

Nana用特等生嘅身份帶咗我去佢班房度，而出現喺四神旁邊嘅我自然成為焦點。因為係班上嘅學霸，佢就被安排到最前面嗰行，臨走前仲特登笑住向我揮手道別。我無視周圍嘅學生坐咗喺角落頭其中一個位度，聽住講師呢堆「不明所以」嘅演講。

「指引愛嘅道路…麵包上面嘅糖…. 砂糖同埋蜜糖嘅關係可能會太甜，但係喺愛情上面甜甜哋又唔係壞事。」





我格離個女仔一路口嗡嗡嘈撚住哂係咁講堆聽唔明嘅嘢。

「如果甜得滯又會太苦，愛情真係罪過，所以苦澀先會係味蕾嘅黑，彌散喺痛苦嘅過程。嫉妒…就係從中誕生嘅自我厭惡。」

個女仔相比Nana同小櫻，絕對稱唔上靚，係你會行旺角隨處見到嘅女仔。如果比我去評分，大概只有B級評分，連同靚都沾唔上關係，相貌平平嘅平凡人。眼細細，但鼻長長，叫做救返個平均分，正正因為咁，我好似曾經見過呢位「大眾臉」小姐。

佢用自戀，充滿無違心嘅視線，甜到融化嘅神情望住我，但係本能同我講佢並唔係望緊我，就好似一條冷血、無慈悲憐憫嘅毒蛇密謀住我所珍惜嘅人。相比人命，自己想食咩比較重要，自我中心到扭曲嘅極端。

「你…優悠寡斷…Nana真係慘，你嘅每一句都係惡魔嘅低語。」

我無理到佢，繼續㩒手機…

鑑於先前同Nana嘅約定，我唔可以向第三者透露呢個月發生嘅事，佢先肯還返部電話比我。我懷住複雜嘅心情同Molly久違地傾左陣計…一諗起Molly個樣，我個心就融融地咁。

「….我叫做不知火，你叫咩名？」





一聽到不知火呢個姓，我就即刻記得Molly曾經提過有個童星出身嘅舞台劇演員。憑住出神入化嘅演技，年僅八歲就獲得大家嘅肯定，成為韓國學院嘅表演顧問。不過由於長期浸淫於現實同劇本之間嘅殘流洪溝，各大傳媒曾一度診斷佢患有「不時性精神缺陷」。由掘起到引退只係用咗短短四年，外界稱之爲「被神放棄嘅替身演員」。

「原來就係你…」

難怪一直覺得佢好面善，我同家姐之前都喺電視睇過佢表演，不過當時化咗妝而且已經係不知火初出道，所以認唔出佢。

「同我做個朋友，我交你點樣攻陷Nana。」

佢一副搵到同謀，填滿內心空洞嘅笑容，按奈不住，向我發出友好嘅邀請。