我鍾意咗我親生姐姐，但係佢已經有男朋友？！: 女神候補篇（9）

花音雖然之前已經提過我幾次，但係首次親身見到女神實體化不禁係會感到詫異。被女神附身嘅小櫻大體上冇咩變化，不過頭髮比平時長咗少少，髮尾有些微淡藍色（接近忌廉奶昔feel)，雙眼瞳孔呈現雙星狀態。

同平時嘅氛圍有少少唔同，過於冷靜嘅語氣就如同精密機器一樣咁向我提問關於小櫻嘅關係。

我表面上恢復正常，但極力強忍內心嘅驚恐：「我…係佢嘅朋友。」

「淨係朋友關係？」維納斯笑淫淫問我，將原先冰冷冷嘅形象完全破壞。佢一路捲住小櫻嘅頭髮表示好奇，似乎唔係好相信我嘅答覆，「可能我哋女神界比較保守，乜原來朋友之間都會錫大家架咩？」佢伸手觸碰我胸口，就好似想竊視我嘅想法。

我當然即刻連聲否認，但維納斯表現到已經睇穿晒所有野，看破紅塵噉。





佢慢慢浮起身，攤喺半空中，懶洋洋咁再話：「人少少咪認左佢囉，反正我身為今次附身對象嘅女神候補，我可以同你講個女仔都真係幾鍾意你。」「如果100分係滿分，我諗～～大概都有6-70分，而且佢個胸又咁大，你咪揀佢囉，之後你想點對佢都得啦～又可以幫到我…」

我聽到佢最後一句就即刻覺得佢主要目的都係想說服我幫佢成為優勝者，嗱嗱聲覺醒之後返上天界。

「呢啲嘢我都係想認真考慮，如果我到時真係對佢有嘢自然會揀佢…你唔使再迫我。」

佢聽完我講反而冇再拙拙迫人，而係起身坐返喺半空，揸咗下小櫻對E級燈，露出不解嘅表情。

「人類嘅愛情，你哋女神又點會明呀。如果唔係你哋就唔使千幾年都仲loop緊同一個比賽啦。」





我講完呢句，維納斯就開始掩嘴笑住同我講：「上次有人咁串我都唔知係幾耐之前嘅事，人類..你挑起左我對你嘅興趣。」「好，我就睇下你到底點揀，最後會唔會hurt到個女仔。」

講完之後小櫻就變返之前嘅佢，女神化嘅狀態亦順利解除。

「但係你唔好忘記，我24小時都觀察緊你～你自己執生啦。」

睇嚟花音嘅「心電感應」喺女神之中已經係常態，宜家嘅維納斯只係解除左實體化，意識仲係巧妙咁保存喺小櫻流動意識附近。