我鍾意咗我親生姐姐，但係佢已經有男朋友？！: 女神候補篇（7）

「櫻B～點呀最近，做咩App你又唔覆呀？」

「係囉！難得我哋兩個都拒絕晒其他女仔，你知唔知我哋幾受歡迎啊！其實我哋明益你架！」

嗰兩個輕浮男不斷騷擾櫻蘭，而佢都罕見地向我露出求助嘅眼神。理論上，一般嘅情況我相信無任何女仔會拒絕兩個校草級別嘅男仔，仲要係把口油到一個點嘅後生仔。與之相比，我同街邊嘅野草其實冇咩分別。但係相比自己，我更加討厭熟悉嘅人喺眼前受傷。

我推開左其中一個男仔：「你見唔見到小櫻佢唔想同你講嘢呀，如果唔想咁難睇，我比三秒…」

然後我就比佢撻咗落地。





「你又邊撚個呀…你乜料呀。做架倆？你係小櫻邊個呀。」佢騎喺我背上，扭住我隻手，越發大力咁質問我。

佢格離個fd仲喺度加鹽加醋，分明係想扭斷我隻手。就算櫻蘭點叫佢放手，佢都冇聽。正當我以為隻手係咁歹嘅時候，個男仔喺我視線範圍內一瞬間消失咗。

我微微望向Nana，只見佢罷出戰鬥姿勢，完美無瑕嘅左飛踢直擊嗰位男同學塊面，踢到佢流哂鼻血，鼻樑都斷埋。

「啊啦啦！唔好意思，我以為有啲烏蠅飛過，所以想踢走佢添！你冇事呀可？」

面對住惡之女王嘅威嚴，嗰兩個二打六狼狽咁逃離咗現場。





由於發生左單方面嘅宰殺事件，都叫牽起咗場小風波。而啱啱出現嘅西方貴族同學就斯斯然咁同在場咁多位學生講：「Hey! Everyone, leave here immediately! 」

佢一聲下令，其他人就雞飛狗走咁散開咗。

「Nice to meet you! My name is Cynthia…the president of this college.」

==

「點呀你.. 明知唔夠人打就唔好衝出去啦，死蠢。果然係蠢狗狗呀。」





櫻蘭雖然一路話我，但係從佢手勢可以得知佢係好輕力咁幫我敷緊塊面啲傷口。我望住佢微震嘅小手，都估到佢其實有小內疚。如果唔係因為佢，我就唔會受傷，我知道自尊極強嘅佢一定仲會責怪自己。

「唔好意思…呀」

「做咩唔好意思啊….你唔好亂郁啦。陣間又整親呀。」

「我…頭先叫咗你小櫻呀，你唔會殺我架可。」

無錯，初初見佢嘅時候，其實都係兩日前。櫻蘭曾經同我講過如果我敢叫佢個花名「小櫻」，佢就會殺咗我，不過頭先危急關頭我的確叫錯左佢個名。同我嘅傷相比，我更加介意我叫錯佢個名呢件事，我唔想破壞左我地之間辛辛苦苦建立嘅關係。

佢呆左咁望住我：「吓？你就係介意呢件事呀wwwww（爆笑」

「你真係好蠢好搞笑呀…不過頭先…」

「…」





因為太細聲，我完全聽唔到佢講咩。

然後佢烏低身靠近我耳邊怕怕羞咁錫咗我塊面一啖。

「我係話.. 多..多謝你呀…同埋你以後可以繼續叫我小櫻…. 不過，你唔好誤會呀，我祇係想多謝你先.. 總之你唔好諗咁多啦柒頭。」

我哋兩個面都紅晒咁相視住大家….