我鍾意咗我親生姐姐，但係佢已經有男朋友？！: 女神候補篇（6）
Nana離開咗大廳之後，我自己一個清晒佢精心炮製嘅早餐。不過仲係覺得有啲意猶未盡。雖然我平時唔係食開煙嘅人，但如果壓力太大嗰陣間唔時都會隊返兩啖，呢度勝在露台夠大，如果唔係我又要偷偷地出門口呼返兩啖氣。
我久違地喺褲袋抽出一盒煙，尼古丁嘅味道已經慢慢浮現喺我記憶之中。可能有啲人唔鍾意嗰陣味，老實講我都唔係幾頂得順，但陣煙草味硬係有種莫名嘅吸引力令你開行個turbo。
食煙，我相信大部分女仔都唔係咁想另一半有呢樣喜好，一嚟貴、二嚟傷身、三嚟火車頭係一件極自私，害人害己嘅劣習。所以我真係唔想比Molly、家姐知道我會食煙。我行出二樓露台，望住一望無際嘅大海，大大力呼吸咗一口晨早嘅新鮮空氣….
然後左手拎起其中一支煙，咬住煙嘅末端，再用打火機準備燃點香煙嘅頭端，享受呢度無人阻撓嘅時光。
「喂！阿唏，呢度唔俾食煙….」
櫻蘭無端端行出嚟吹熄左我支煙。我望一望個鐘，九點鐘，似乎係到咗佢起身嘅時間。
「啊…唔好意思，我落街食。」
都係嘅，家有家規，我都無謂強人所難，原先仲諗住冇人見到就食返幾分鐘。
點知櫻蘭出奇地搶走我包煙，摙到盒野爛晒：「我唔係咁嘅意思，我係指我唔俾你食煙，你估你係陳冠希？人哋拍頭文字D嗰陣你仲飲緊奶咋，同埋你就算點食都唔會靚仔架啦，仲要搞到呢度污煙漳氣。你千祈唔好比Nana見到你食煙添呀，佢殺咗你都似。」
一反常態地嚴勵嘅櫻蘭向我說教，表現出一副焦急嘅口吻。
「同埋…食煙又唔係健康，總之盒煙我會幫你處置，你唔好再食啦，下次比我再發現我真係唔放過你..」
佢眼神堅定咁講。
「ok…. 好啦好啦，我應承你，唔再食煙啦，唔好再散發出你可怕嘅殺意。」
我向佢再三保證唔會再食，佢先叫做冇再啤住我。隨後Nana終於冷靜完行返出嚟：「啊喲！你起咗身啦～小櫻…」
「係…係呀，早晨呀娜娜仔..」
佢嘅目光又放返喺我身上，示意我即刻扔走盒煙。
「…啊！Nana，今日你諗住去邊度呀？」
我強行轉移話題，而櫻蘭就趁機行開消滅罪證。
「你差我個人情呀，衰人…」
==
Nana終於入正題：「好啦，其實我同小櫻今日要返學…我地假假哋都係大學生，無理由日日喺屋企無所事事架嘛。我哋今次返嚟香港係想讀返個碩士進修下自己。」
櫻蘭即刻開口補充：「啊.. 又要返去對住班mk狗公，真係好煩…完全唔想見到佢地…日日淨係識問我地出唔出去，約唔約.. 真係反撚哂白眼。」
對於Nana同櫻蘭私生活完全唔了解嘅我，頓時對佢地嘅校園生活十分有興趣。話就話聽過佢地係稱霸藝能界嘅四神，不過都幾想親眼目睹佢哋魅力四射嘅畫面。而且自己一個喺屋企又真係冇嘢做…
「反正都係鳩流流，我可摸以跟埋一齊去。」
聽到我想跟埋佢地兩個一齊返學嘅倆人互相對視片刻，然後笑咗出聲。櫻蘭率先開口：「梗係得啦，而且有隻乖狗狗跟住，一定唔會咁悶先…」
「喂.. 小櫻，點可以咁無禮貌。不過如果有阿唏你喺度，我都覺得應該唔會咁悶…呵呵呵…額..」
唔知係咪因為今朝讚完Nana，佢講呢句野嘅時候都唔係好敢正面望實我，淨係四周圍張望，少少無所適從。
好快手佢哋就唔知喺邊度班咗套裇衫比我：「嗱！記得著好睇少少呀，如果唔係出到去我唔會理你架！」櫻蘭罷出佢嘅招牌吐舌動作。
雖然我係眾受周知嘅遲頓怪，但係我明呢種感受…同之前家姐嗰陣係一模一樣。即使佢哋對我講嘅說話可能有少少難聽，但係可以清楚體驗到佢哋每一句說話都帶有清新嘅果香。並唔係帶刺嘅仙人掌，反而係會令人想回味無窮嘅香甜果肉，如果你肯花少少時間去咀嚼，你就會打開到新世界嘅大門。
就算我冇使用到魔眼去補捉，我都知道佢兩個應該對我係有少少好感。憑我望到佢地嘅笑容，就好似望住家姐同Molly嘅「影子」一樣，或者係我本人嘅進步？但係呢份成長係打從同家姐關係變close之後一直延伸到今日嘅養份。我只係希望可以儘快喺幾位女神候補之中選擇到「正確」嘅答案。
「我ok啦！你哋得未？」
不足二十秒，倆位女神大人都以完美嘅姿態行出房門，向我搖頭數下表示：「等緊你咋！」
==
到咗學校之後先發覺佢哋不愧係四神，喺我認知入面，香港最勁嘅大學已經係科大，而呢間大學嘅size比佢仲要大多2 round。我即刻上網查一查，發現原來呢間嘢叫「帝都大學」。係由法國、日本、意大利、韓國、加拿大、美國，聯合所合辦嘅世界公認第一演藝及模特兒學園。
裏面個個學生都才高八斗，智勇雙全，從眼神睇得出係另一個世界嘅居民。只要同佢地對視，彷彿就會比佢地吞落肚一樣，係屬於我永遠都唔會接觸到嘅群體。而當刻嘅我就夾左喺兩位「四神」中間更顯得特為出眾。周圍嘅學生都竊竊私語，唔使估都知係講緊我，呢種壓力就好似一個新手村村民啱啱解鎖完新手任務就要打Lv9999999嘅boss一樣咁窒息。
「hiiiiii~Nanaaaaaa！」
遠處見到有位生得好有西方貴族feel嘅女同學向Nana打招呼，旁邊仲有幾位高大靚仔嘅男同學不約而同地同櫻蘭搭嗲：「好耐冇見呀！櫻B！！！」
就係咁，我嘅第一日跟尾狗校園生活揭開左序幕。