我鍾意咗我親生姐姐，但係佢已經有男朋友？！: 女神候補篇（5）

「小櫻…我地有嘅係時間，毋須要用呢啲［下流］嘅手段去狩補獵物..」

Nana一臉厭惡且帶有寒意咁望住櫻蘭。

「你又唔記得啦！我地係Lady，點可以用埋呢啲乸渣方法去贏取男人嘅身心。以前、宜家、未來，我哋都係靠高雅嘅自我去俘膚全世界…定還是係你覺得我哋會輸比Molly，所以先…」

就喺Nana準備起身之際，櫻蘭即刻縮開對腳變返個乖乖女。

「娜娜仔…佢雖然係最高貴嘅女性，但同時亦都係最暴力嘅女王。佢曾經憑一己之力將10個跟蹤佢嘅痴漢打到入醫院再利用法律漏洞屈咗佢哋幾十萬…」





櫻蘭細細聲咁講，而我都深深咁體會到Nana可怕嘅第三面。

於是乎，我哋餐飯好快就到尾聲…

==

先綜合一下今日所發生嘅事…我返到房就嗱嗱聲沖涼，冷靜一下。宜家嘅我係身處喺兩位美少女嘅屋企之中，仲要同佢地同居一個月。最重要係佢地同我係完全無血緣關係，所以隨時刷槍走火都唔奇。單純係呢一點，我嘅理性就已經就快崩潰。

但其實最最最大嘅理由係我對佢地印象嘅轉變性。一開始的確，Nana比我嘅感覺係個無禮貌嘅女仔，因為自己生得靚就處處同Molly作對。當然我冇了解過佢哋之間嘅恩怨，但係就因為Molly嘅片面之詞標籖咗佢嘅壞印象。





而相處落嚟嘅呢日，唔止Nana，連櫻蘭都其實只係一個隨處可見嘅女高中生…. 時而微笑、時而憤怒、時而哭泣，但又會為自己嘅夢想奮鬥嘅少女。

雖然水溫好熱，但係仍然沖唔淡我對佢兩個嘅罪惡感…我望住塊鏡，由於魔眼能力嘅緣故，清清楚楚咁睇到哂自己內心深處嘅聲音。

「雖然未有明確嘅情感，但係某種正向嘅思想開始澎脹」

周圍嘅霧氣雖然好大，但係我知道宜家嘅我…我知道我嘅眼神，我可能會因為呢個月嘅洗禮而變到唔再討厭Nana同櫻蘭。


==





好快到咗第二日朝早，Nana好準時八點就叫醒咗我。

「起身啦～阿唏！啊啦啊啦！再咁懶訓就唔比早餐你食架啦。」

Nana一身潔麗嘅西洋服令佢顯得格外醒神。頭髮亦係典型嘅高卷造型，如果冇返一兩個鐘絕對做唔到呢個Style。同以往嘅日式風格唔同，今日嘅Nana簡直係一個來自西方國家嘅氣質才女。一起身見到陽光襯映下嘅佢笑得咁溫柔，我九秒九stone哂。

重申一次！！！家姐絕對同Nana有近乎相同級數嘅美貌，但係性格完全相反…. 莫講話雞蛋，連杯面都唔識整。而Nana仲可以咁早起身打點哂全部野，仲要顧及埋衣著整潔加上仲要咁自律。我真係不由得再次對佢感到十分佩服….

如果話Molly係照耀我心靈嘅太陽，Nana就係背負一切嘅月亮。就算面對任何困難都會咬緊牙關永不放棄，對所有野都追求到完美。

「唔使理小櫻住，佢琴晚練西班牙文練到好夜…由佢瞓晏少少啦。」

Nana邊向我遞上餐具，都不忘保持閃閃發亮嘅氣場。





我眼定定咁望住Nana，打算調戲下佢：「errr…Nana，你塊面有啲嘢..」

佢好快咁放低咗原本遞比我嘅餐具再摸摸自己塊面：「有啲咩呀？我明明應該做好哂防曬，搽晒美白架喎。琴晚臨瞓前都敷左次Mask…冇理由架。」

原本諗住整古佢，點知見到佢咁認真，我忍唔住笑咗出嚟：「冇…想話你塊面有啲靚啫。」

聽到我講呢句嘅佢塊面即刻紅晒，好大聲咁講咗句：「SHIT！你…呢啲技倆呃下Molly就得…我…我…點會比你…」，然後就走左去一二邊。

反差如此大嘅Nana搞到我個心都有少少差啲淪陷，唔知第幾次不由自主地諗：「如果家姐有佢一成就好啦…」