我鍾意咗我親生姐姐，但係佢已經有男朋友？！: 女神候補篇（3）

花音之前唔係話女神候補得三個咋咩，點解又會多咗兩件架….我都未搞清現況，麻煩已經一浪接一浪。

Nana用手扣鎖住左我：「由依家呢刻開始～你已經唔再係Molly隻狗狗，係我嘅狗狗！哦呵呵呵.. 乖乖聽話」佢邊摸我頭邊發出亮麗嘅笑容。

櫻蘭附和：「你應該慶幸今日有兩位靚女陪住你。好似你呢啲人…除非啲女仔盲咗，如果唔係一定唔會有機會可以同佢獨處。」

的確，街上嘅男人都向我投以羡慕嘅目光，不論係拖住女朋友嘅、單身嘅、年老嘅阿伯還是係一臉認真嘅社畜。我彷佛聽到佢地內心咒罵緊我幾時死。

Nana拖住我隻手，將手扣嘅另一端鎖喺佢左手度：「正如小櫻話齋，根本冇可能會有好似我哋兩個呢種女神願意拖你手仔。你唔使～指～意～走！」佢一臉認真望住我。





「喂！娜娜仔，其實我冇話拖架，係你自己想拖咋..」

「真正優雅嘅Lady～係好應該學懂包容一切～你唔諗下我地點解可以稱霸全日本高中嘅票選，再成為Model界嘅新星？無錯，答案得一個，就係因為我哋夠大度。就算係點嘅困境，我哋都一一忍讓，一一迎刃而解。所以我哋先會係零緋聞嘅兩大女王，睇嚟你距離真正嘅Elegant Lady仲有一大段距離…」

櫻蘭雖然面有不甘，但係對Nana並冇一絲不滿反而係有少少高興咁嘆咗一口氣：「果然都係唔夠你嚟…好啦，我就勉為其難咁….. 拖住呢隻勾勾嘅手啦。」

就係咁，我嘅第一次一拖二終於達成….

==






「…. 到啦，乖勾勾，歡迎嚟到我嘅宮殿！」

Nana帶咗我去一間超～級～大嘅毫宅入面，同我屋企相比，應該大約相等於一百間書房加埋。同埋清水灣呢啲高級地方根本就唔係我地凡人可以觸法嘅地區，不禁令我懷疑佢係咪有秘撈先買到咁大間屋。

「…我勸你最好返屋企之後即刻求返支好簽，娜娜仔從來都冇帶過男仔返屋企….. 雖然話佢係想搶走Molly嘅嘢，但係佢應該都幾鍾意你…. 哼，真係世風日下。」櫻蘭唔知幾時拎咗支棒棒糖出嚟就行開咗。

「好啦好啦，既然返到屋企就可以除開手扣…. 由今日起你就要同我地兩個一齊住。我同小櫻平時都係一齊住，你要心懷感激我哋，因為你呢世～都冇可能同咁可愛い同綺麗嘅女仔住在同一屋簷下！」

佢根本唔比我作出任何反應…我都懷疑我有冇命返到屋企。





「你屋企人方面，我已經派左「熟人」同佢哋講你抽中咗兩張雙人來回倫敦嘅機票，呢個月都唔會返去。至於你家姐，佢都幾冧你架～喎～佢聽到你去旅行唔帶埋佢當場喊到暈左。」

「不過你放心～我已經幫佢安排左最好嘅醫院，錢銀方面我已經比左一億你父母…請你安心。呢個月就請多多指教！當自己屋企就可以，唔使咁拘謹。」

Nana講完就返咗房，留低咗我喺客廳。

事到如今我都冇嘢可以做到，呢一帶全部都佈滿高度安全戒備嘅軍事裝備，憑我隻身一人冇可能走得甩。如是者我返返佢哋為我貼身準備嘅「新睡房」。

一打開度房門，我成世仔都未見過咁大間房，剩係床都夠塞五十張。怕且過咗呢個月，應該會更加了解貧富懸殊嘅嚴重性。

==

到咗夜晚，Nana好有禮貌咁敲敲我房門：「夠鐘起身啦，乖勾勾～快啲出嚟食飯啦。今晚為咗歡迎你，我特登下咗番苦工，你一定會鍾意食！呵呵呀♪───Ｏ（≧∇≦）Ｏ────♪」





一先以為佢係個自大又經不起風浪嘅大小姐，似乎係我對佢有些小偏見。下次真係要向佢好好賠罪先得。

餐枱上全部都係我平時只會喺電視上見到嘅美味佳餚，黑松露和牛、紅酒抆伊比利亞豬、波士頓大龍蝦、法式烤羊肉。呢餐飯加埋我諗都要幾萬蚊，不過最令我大為驚嘆係如此繁複嘅手勢竟然全部都係出自Nana一手一腳自己整。明明性格同家姐都係屬於惡劣大小姐型，但係「竟然會咁入得廚房出得廳堂」，唔怪之得會同Molly一樣有咁高嘅評價。

第二樣引起我注意嘅係櫻蘭，同先前出街嘅裝束唔同，佢換上一件紫色嘅睡衣，透到見到胸前兩粒的，若隱若現，兩個大木瓜彈下彈下咁。加上解開髮綁嘅黑長直顯得佢比較孩子氣且不失貴氣，或者因為喺屋企嘅緣故，佢嘅眼神恢復返正常女仔應有嘅色澤，唔再係虛假、暗啞嘅淡色。

佢坐喺我旁邊充滿生氣咁望住我：「唔好浪費娜娜仔一番心意啊。如果你有剩一粒米，我會代替娜娜懲罰你。」

面對轉變咁大嘅兩大女王，我對魔眼開始有啲怪怪地….