我鍾意咗我親生姐姐，但係佢已經有男朋友？！: 人生相談（4）

「話說…你咪有對魔眼嘅（笑），好好運用你個腦，多善用你嘅判斷力，其實唔會好難架。」

一聽到「魔眼」呢個詞由花音口中出現，我就大為震驚，因為呢件事應該全世界得我一個知。

「哦～你好好奇點解我會知道關於你對眼嘅事呢？」佢舔咗舔手上嘅朱古力..

「你又唔係唔知我原本就唔屬於呢個世界，係非人之物。既然係咁，知道同樣係非理之事又有幾奇。我假假哋都係神所創造嘅奇跡之物，同身為［女神候補生］嘅佢哋本質上係一樣。」

「雖然我唔可以再透露更多相關資訊，不過我可以同你講我都係魔眼持有者之一。當然太一係毫不知情，身為人類嘅佢承受唔到神之力，唯有由代行者嘅我去背負呢份力量。順帶一提，我嘅能力係（未來視），你嘅未來我已經睇得一清二楚…你好自為之啦，哈。」





聽佢講完之後，我第一反應係關於［女神候補生］嘅後續…

花音可能睇得出我嘅顧慮，繼續將話題伸延到女神候補嘅下半部份。

「嗱！我可以同你講，你家姐，小倩都係強力嘅女神候補。只要你加把勁攻略佢兩個，成功只係時間嘅問題，至於Molly，哼！再講落去我就會接受神罰架啦。不過作為補償，等我同你講個故仔啦，喺遙遠嘅神代之前，眾神為咗挑選天界最適合嘅女神代表…曾經舉辦過一場選拔賽。分別係由三個女仔進入最後試練，之但係佢地三個實在係平分秋色，神明代表猶豫左五十日都揀唔落手..」

「最後佢哋決定將呢個選擇權付托比自己嘅子民，而子民又將機會付托比後代。久而久之，呢場選拔逐漸成為都市傳說，芳間神話，直到而家仍然未有答案…而神嘅子民不斷轉生到現代，以百年為週期重生到現世嘅某人身上。」

聽到呢度我大概知道花音下一句想表達咩。





佢指住我：「無錯，你就係今世神所指定嘅後代。你所見到嘅［神魂］就係當年並未選上嗰三個女仔嘅力量殘留。當神魂值被點滿嘅同時，女神候補就會覺醒成為愛之女神。而你家姐同小倩同樣都係被挑選嘅對象之一。」

其實我仲有好多嘢想問，不過花音好似冇咩時間剩，佢個身體開始變返做太一….

「今次就講住咁多先…. 有咩下次再講啦，多謝你杯雪糕。加油啦，阿唏你個死蠢…」

我個腦由於資訊量過大開始當機…