我鍾意咗我親生姐姐，但係佢已經有男朋友？！: 人生相談（3）

大概係一年前開始？我同家姐關係開始疏離之後，我可以慢慢睇到女仔嘅神魂。以下等我簡單講解下乜叫「神魂」。


其實之前同家姐、小倩、Molly佢哋出街嗰陣我已經依稀見到依附於佢哋身上嘅能量。為咗令自己更加容易去理解呢種特殊能力，我仲特登做咗幾項實驗去引證自己嘅猜想。終於幾經波折，我可以證實到呢種「神魂」係源於天界女神嘅祝福。假如嗰個女仔身上嘅「神魂」量越高，佢就係越接近「女神」本體嘅受肉體。即係「女神」會降臨喺佢肉體上，令佢獲得天下間最幸福嘅戀情。但前提係….你一定要令個女仔傾心於你，先可以提升佢嘅「神魂」值。

我都知要接受呢啲非科學，接近魔法嘅空想係天荒夜談.. 不過呢啲係確實存在嘅絕對事實。

早幾日已經見到家姐嘅神魂量覆蓋到佢雙腳上，紫紅色嘅強光甚至殘眼到令我產生幻覺。而先前小倩亦有部份粉藍色微光喺佢右眼度閃下閃下…靈力嘅具現相等於感情嘅強烈。所以先令我確信「神魂」並非虛構。假如…我係話假如…如果家姐嘅神魂值達到滿分，我可以好肯定咁講，我同家姐一定會開花結果。

我好細個嗰陣曾經聽過我老母講佢以前同我老豆一齊嗰陣都係因為得到「女神」嘅祝福先會keep到咁完美嘅婚姻。可惜聽完都只係一笑而過，冇理到…..





花音係隱藏喺太一靈魂背後嘅另一端，雖然係同一個人但又係唔同人。如果用simple words去解釋，就係太一對於佢一直忍受又不能公開俾大家知道嘅情感投射。一直被封印於黑暗，得唔到任何回報嘅第二人格。唔知係咪連神都覺得可惜，又或者係憐憫，呢個人格喺太一中學嘅時候得以喚醒，甚至係擁有短暫自主權。當花音蘇醒同時，主人格太一就會陷入沉睡。

花音由中學開始就好鍾意為難我，成鳩日比麻煩我，但其實我本人冇咩所謂，既然佢係太一一部份，我都會接納佢。

「阿唏，咁耐冇見…你又出去沾花惹草啦下話～」佢同阿唏性格完全相反，老實講我有時都唔係好知點handle佢。

我：「你幫下我啦好冇呀，花音..」

奇怪嘅係今次佢冇潤我，反而有少少唔係好happy咁。我望咗佢一陣，佢終於開口：「我問你一個問題，你覺得我係一個點嘅女仔？」





我唔識答佢，因為我根本冇用異性嘅眼光看待過佢。但係既然佢問到，我唯有照直答…

「我….」

我都未講完佢就直接打斷左我：「你由答我嗰刻已經輸咗，因為女仔一問呢條問題其實已經收咗你皮，你點答佢都會有位入你。出街拍拖都係，你唔應該向我提問［點樣可以同Molly成為完美情侶］，而係［我要佢唔能夠冇咗我］。女人呢種生物，一係你食住佢，一係佢食住你。你家姐有板你睇啦～」

我：「但係佢依家唔係好冧我咩？」

花音聽我講完之後笑到碌地，懷有惡意咁串我：「冧你又點？你一日未同佢確立關係，佢都唔會有安全感…再咁落去，佢遲早比人搶走。」