我鍾意咗我親生姐姐，但係佢已經有男朋友？！: Molly的約會（3）

Molly爭大隻眼望住我，加上今日又帶住副con，可以睇得出佢瞳孔係微微咁郁緊。先前我曾經提過下Molly係屬於大和撫子風格嘅女仔，但呢點只限於佢唔出聲嘅時候。In other words，佢係一個角度限定嘅大和撫子，如果佢出聲就會搖身一變成為一個口講唔停嘅細路女摸式。（喺我眼中係無死角女神）

由於我啱啱比佢嘅答覆超過佢expectation，佢唔係好知點比反應我，連眼尾都唔係好敢睄我：「喂呀，你…唔好玩我啦，姐姐我會當真架，你..你…你一定係成日咁flirt女仔，唔使狡辯。」佢用一把震哂嘅聲綫咁講，隻耳仔都已經紅到透光。

睇佢咁嘅反應，我估我應該中咗大奬，佢臉上嘅失意已經完全冇哂，反之而嚟嘅係一副花痴臉，想笑但又要忍住唔可以表露出嚟。我都係第一次見到Molly興奮到就嚟流晒口水落張枱度，佢左手遮住個嘴發出從未聽過嘅「㗇…暇..」聲，喃喃自語。

「我唔會中…計架、阿.. 唏，姐姐我…好歹都叫做26歲。男人嘅…甜言蜜語，你覺得我…我…我…會未聽過？」佢坐喺疏花上面周圍望，但就係唔敢直視我。


「如果你..再唔講真話，我唔理你架，我嬲你架…」





我今日係第一次見識到原來現實世界真係有女仔會變到好似漫畫角色咁講嘢。怕羞到輕晒機嘅表現令我拍案叫絕，我知道我一定要食住個勢上，如果唔係一切都會付諸流水。甚至我曾經有一秒擔心過佢會唔會忽然過熱暈低。

我企起身捉住佢隻手，慢慢咁，細細力拖住佢，就住就住咁握住佢雙手。仔細感受一下佢嘅過敏反應，感受一下佢皮膚組織所散發出嘅「灼熱感」。去到呢度我已經睇得出Molly已經胡言亂語，唔願相信事實嘅迷惑樣。呢種心跳心跳嘅「某種萌芽」嘅意志，我都唔肯定係咪戀愛。但係心跳加速嘅頻率遠遠多於小倩，至於家姐…

去到臨門一腳，我用眼神回敬Molly：「真係..我真係…好想.. 了解你多啲。唔關家姐事，唔關小倩事，係關你事。Molly，坐喺我面前嘅你，就係困惑我多日嘅女人。你信我啦！」老老實實講到呢度我自己都忍唔住笑，吹到咁離譜。但係希望俗語所講嘅「戀愛令人充昏頭腦」係真啦。只要佢受，就萬事大吉，如果唔work我就有排煩。

雖然我覺得咁樣做嘅效用未必好大，但係真誠嘅眼神，真實嘅心意往往就係連繫雙方心靈嘅必要武器。我覺得我宜家唔講，就真係everything gonna be too late。

不過女人都係敵不過口甜舌滑，男人的嘴騙人的鬼。Molly終於都係敗喺我嘅死心塌地之下：「姑…姑且信你啦，講明先啊，我.. 對你冇嘢架，我唔會做啲越界嘢，費事比人叫偷腥貓。」佢仲哼咗一聲以表強調。





「咁..我哋宜家可以去玩啦係咪？」

佢又恢復翻生氣勃勃，元氣滿滿嘅爽郎笑容。今次唔單止係拉住我隻手，而係由佢主動，直接咁拖到我實一實。相較之前單純嘅作弄式性行為唔同，今次明顯地feel倒佢所傾注嘅各種心意同名為「愛」嘅果實。

「今日一定要好好滿足我呀～男。朋。友！」