我鍾意咗我親生姐姐，但係佢已經有男朋友？！: Molly的約會（2）

「所以…你又會突然間搵我出嚟嘅？」

Molly就好似睇穿咗我心思，我郁下條尾都知道我諗咩咁。

「咪住先…比我估下～嗯…係咪關於女仔～」佢笑淫淫咁問。

我比佢超凡嘅第六感嚇親，即刻唔敢出聲。明明我咩都未講，淨係message 佢話想出街，點解佢咁都知。我冇當Molly係工具人，因為同佢相處真係好開心，如果話小倩帶俾我「懷念過去」嘅春雨，Molly就係給予我「自然舒服」嘅秋風。我仲點會因為家姐嘅煩惱先搵Molly，至於事實係點，我內心其實…

「如果冇估錯，應該係關小倩，你家姐或者其他女人事～」佢用一副事不關己嘅語氣向我問話。





當然，真係全部比佢估中晒。

「.. 點解你會知架？」我好奇一問。

佢即刻邪笑咗下：「你仲記唔記得第一次見面我同你講咗啲咩？女人有心事無非都係兩樣嘢，姐妹情同埋男人。其實男人都不外乎，錢，兄弟同女人。錢我估你冇架啦！」佢言閑之間都不忘挖苦我，「咁自然就係關女人事，而且我同你講過有咩事同姐姐講，你好日都唔搵人地一次，無端端message我，傻嘅都知咩事啦。不過我大你6年，人生經驗比你豐富，一定會幫你。」佢自豪咁拍拍佢對豪乳，示意我唔使擔心。

「不過你果然係一個罪人，令到咁多女人為你傷心。你真係一個壞男人。」Molly輕輕咁嘆咗下氣。

面對佢直白嘅吐嘈，我頓時無言以對。





「好啦，你講啦，今次關邊個事。」Molly口中雖然表現得淡定，但係我feel倒佢帶點寂寞。

其實以佢性格，我知道佢係一個口直心快，極其單純嘅女仔。雖然係成人用品店嘅招牌sales，對「性」好熟手，但只係一個拍過一次拖，連床都未上過嘅cherry girl。即使遲鈍如我都隱約feel倒佢對我有嘢。但係我平時個幾禮拜先message 佢一兩次，利用佢嘅善心去解悶。更用家姐做擋箭牌去美化自己flirt Molly 呢個行為，唔止一次，我又再次傷害另一個女仔。我恨自己嘅自私，我恨自己嘅優悠寡斷。

明明佢都親口講過自己期待左今日幾耐，毫不掩飾對我嘅渴慕。但係我一出到嚟就比佢睇得出我嘅心不在言，仲要實牙實齒同佢講同佢出街好開心，我真係好想斬撚死頭先嘅自己。我唔想抹剎一個對感情如此上心，性格專一進取嘅女仔。放眼香港，Molly已經係出街已經溝死仔嘅極上品，猶如放喺馬路上毫無防備心嘅小狗。而我嘅所作所為同佢Ex一樣，無疑係對佢嘅背叛。

我應該點？

我應該點答佢？





如果係家姐，呢個時候我只要係咁二氹佢兩句再煮碗熱辣辣嘅飯就搞掂。如果係小倩，只要帶佢睇返場戲再行下夜市就心滿意足。佢哋三個都係可愛絕頂嘅原石，但唯獨Molly係比原石更罕見嘅秘寶。如果用六邊形圖表去顯示，佢將會係世界上第一個「樣貌，性格，身材，生活習慣，自主性，審美觀」都到頂嘅奇人。宜家嘅我絕對冇資格講啲冠皇堂堂嘅理由，但有一樣野係可以做，我內心、大腦、神經、本能，細胞、血液、肌肉都同一時間得出相同嘅答案…「就係要令佢重拾笑容」

經過咗咁多次氹女經同打咸game嘅經驗，我都叫做成長左少少。我腦內訊號亦不約而同地向我個口傳達咗一個以我為前提嘅最佳答覆。

我戰戰驚驚咁開口：「其實…係你…」

告白氣球都有歌你唱「我手一杯，品嘗你的美、留下唇印的嘴」上天啊，求你啦，比我見返佢「唯美嘅笑容」啦。真係唔想佢為我而喊。