我鍾意咗我親生姐姐，但係佢已經有男朋友？！: 家姐嘅困擾

家姐好大力咁拮落地下，地扳已經比佢刮到花晒，有幾條痕特別深，可想而知佢係出盡九牛二虎之力去打落去。佢手上把刀都已經崩崩地，有幾個缺口，一個女仔竟然可以將磁鐵扑碎，究竟係需要經歷啲咩先可以令情緒爆發出如此力度。

人哋話一個女仔最hurt就係比男仔飛，仲要係因為對方偷食斷正反而俾條仔理直氣壯咁斬攬，我未拍過拖都想象到被背叛嘅心情。我無辦法可以氹到佢，一時之間叫家姐忘記佢係絕不可能，呢啲嘢一定要靠時間衝淡，正因為深愛住佢，離別先會更加痛苦。回憶建築於心靈上面，你越重感情受到嘅傷就越大，原理同彈弓一樣，受到嘅衝擊越強，反作用力更加大。

二十三歲話唔大唔大，話細唔細，家姐呢個年紀要搵多個絕對唔難，當然最想同佢一齊長相廝守嗰個係我。佢同阿Paul只係拍咗一年拖，算唔上長跑，亦唔算短跑，但一年嘅感情對於佢嚟講一定係最為深刻，因為呢個係佢重要嘅初戀。

我行過去，二話不說即刻攬住佢，雖然佢宜家情緒咁激動，如果反抗有機會比佢刮傷，但佢現階段最需要嘅唔係安慰說話，而係陪伴。有時無言嘅支持給予嘅力量比天高，俗語有話一個擁抱勝過千言萬語，你嘅一個小小舉動，已經可以比佢無盡嘅祝福。我同家姐難得先可以再親近返，真係唔想再因為一啲局外人又疏遠返。

我：「家姐，仔咋嘛，冇咗咪冇咗囉！唔需要因為佢而糟蹋自己。論樣論身材，你飯飯掂，樣靚身材正，性格好又會為男朋友著想，絕對係首選女朋友！你想要仔，我可以做你條仔，但係你千祈唔好再咁啦，我見到真係心痛。」





望住佢隻手又殘又裂，啲血又乾曬，想像唔到佢刮手係要受幾大嘅痛楚，而且遠遠不及佢心入面嘅痛，一諗到呢度我嘅眼淚就流晒出嚟，我可愛嘅家姐，溫柔嘅家姐，完美嘅家姐，強桿而美麗嘅家姐，點解要因為一個男人而自殘。我攬到佢緊一緊，深怕一放手佢又會離我而去。

我：「家姐..家姐...」

咁大個仔都未試過喺家姐面前喊，不過今次真係忍唔到，鍾意嘅人自殘仲傷過自己自殘，呢啲就係所謂嘅傷在你身痛在我心。

家姐放底手上嘅刀，狠狠地攬返我，兩人好似動物咁互相糾纏。

家姐：「我幾時有分手，我同阿Paul冇事呀，傻仔，唔好喊，乖...乖...」





佢係咁掃我個頭，好似母親輕撫孩子一樣，我個心被溫柔嘅春風吹過，一瞬間治療起嚟。

我：「吓？咁點解你又自殘又刮地..」

家姐：「冇呀，嗰日返屋企之後我見到你電話響咪好奇𥄫一昅，有個叫Molly嘅人send咗message比你話同你出街好開心，下次一定要再出。本來都冇乜嘢，但越諗個心就硬係有啲嘢咁。之後就唔想理你，明明你又話鍾意我，又同另一個女仔出街。」

家姐把聲開始抽抽地。

家姐：「之後回過神來，已經見到你攬住我。」





講到呢度，我先察覺到家姐好似係呷我同Molly醋，原來嬲唔係因為Paul而係在於我。

我：「咁你係咪即係呷醋呀？」

於是我就掙扎好耐，決定問佢呢個試探性嘅問題。

家姐脹紅左臉，隨即推咗我出房，大大聲講：「去死啦你，死變態佬！」