我鍾意咗我親生姐姐，但係佢已經有男朋友？！: 家姐有少少唔妥

最近，我留意倒家姐有少少奇怪，我每次上前向佢搭話佢都會惡惡地咁瞪我一下，但係又會同我講嘢。事源係早幾日同Molly出街，佢喺男朋友屋企返嚟嗰日開始。

今日係星期六，話咁快已經兩日，我再一次嘗試搵佢傾計「我哋下星期出唔出街呀？」遞埋飲品比佢，希望可以討好吓佢。但佢眼尾都冇望下我就入咗房，Bang一聲山埋房門。

因為咁，我唯有睇電視，費事又講錯野。隔咗陣，我收到家姐個訊息「係呀！」短短兩個字，除此之外乜都冇，完全唔知佢係喜怒哀樂邊一飯，poker face咁款。對於唔識女人心理嘅我而言，同推我去死冇分別。我嗱嗱聲問佢做咩，係咪有嘢做得唔好，搞到佢又西口西面。佢send左句「冇事」比我，從而終結左話題。

迫於無奈之下我message Molly, 問佢關於女人心嘅話題。

「我家姐無端端對我好冷淡，但係佢又肯同我講嘢，又話肯同我出街，你明唔明乜意思？」



基本上Molly同家姐有七成相似，相信問佢呢啲問題一定冇走雞。

無須三分鐘，Molly就覆返我「有冇啲咩其他奇怪嘅地方呀？好人好者唔會無端端嬲架喎，除非你激嬲左佢。」

「女人唔理你無非都係關兩樣嘢事，一！男人，二！姊妹，你覺得佢似嬲邊樣？」琴日朝早之後家姐就開始奇奇怪怪咁，極有理由懷疑係阿Paul同佢之間發生左某啲嘢。我有諗過係咪關之前阿Paul拖住條女單嘢事，但佢無理由蠢到比家姐發現倒掛。

「唔該晒你。」

經過Molly提點，宜家假設有兩個可能性，其中機率最高就係關男朋友事。好多人話女人係敏感嘅生物，但我就話佢地係感性嘅動物先啱。即使佢幾港女格都好，極其量都係對我啫，我見佢對阿Paul都聽聽話話，可能真係有啲咩大件事發生。我輕輕咁敲佢對門，「家姐，係我呀，不如幫你捽下腳呀，好冇？」氣氛好嘅話，應該可以氹到佢出聲，食粥食飯就睇呢下。



我好小心咁打開佢房門，只見家姐好恐怖拎住刀狂捅地下，地板已經碎裂，木碎通地都係，而佢口喃喃道「...........」眼球都就嚟跌出，谷到橙橙地，微絲血管現曬型。第一次見到佢咁嘅神情，望我嘅眼神變到充滿仇恨，一絲家姐嘅感覺都冇。右手手腕有幾處刀傷，傷口已經結焦，有流血嘅痕跡。