我鍾意咗我親生姐姐，但係佢已經有男朋友？！: 麻煩女子

「你終於到啦咩？」一落地鐵就見到一個極其顯眼嘅人影，皆因佢個look特別與眾不同。

Molly著到一身黑，今日嘅造型同黑豹冇咩分別，黑色長袖衫，包到實一實，褲又係老土到爆嘅鴨屎綠工人褲。一瞬間我嘅心情亦被同化，黑到一個點，連少少福利都冇。

不過我同佢係完全唔熟亦冇任何交流，完全唔知佢點解要約我出嚟。除咗家姐，我都冇咩同過女仔出街，真係要講就得小倩一個。

「所以...今日你約我出嚟係做咩？」

我有少少緊張，始終同佢唔太熟，氣氛有少少彊。



「其實....」

佢欲言又止，扭扭擰擰咁，隻手拉住我件衫。

「我想你扮我男朋友！得唔得呀..」佢真誠咁望實我，老實講我最唔擅長應付呢種眼神，女人一用呢種眼神就好似暗示你點都要應承佢，一唔應承就會發爛渣。同哥斯拉冇咩分別。

「...」

「得。唔。得。呀！」



佢重新問多一次，今次嘅語氣溫柔咗，但我隻手比佢摙到好痛，直至到我應承佢之前佢都冇鬆手。

「可以..」

我終於屈服於佢淫威之下，就比佢拉走咗。

行下行下，我哋就去到一間K房入面，入面七彩繽紛，啲燈周圍照，十足十夜總會咁款。呢度污煙漳氣，都知唔會係正常學生會黎，分分鐘有不正常交易同埋賣淫活動。不過Molly拉得我嚟應該會安全掛。話口未完，Molly就開咗其中一度門。

「hi~好耐冇見啦！咁多位sis 好嗎？」



裏面全部都係MK仔女，食煙嘅又有，扯住旗嘅又有，對緊啤嘅又有，同動物園冇分別。「喂！醒定啲呀！有條友想溝我，一陣間記得要同我close啲，唔好穿煲。」Molly細細聲講。

但係呢度個個紋曬身，又有耳窿又剩，我覺得我生命受到威脅。我同佢地比，完全係格格不入。

「喂，Molly，好耐冇蒲頭啦，去咗邊度呀！」一個生得高大嘅男人一手攬實Molly條腰，再喺佢屁股到掃咗幾掃。去到呢刻，我總算知道點解Molly包到自己實一實，成個阿拉伯人，怕且就係要防止呢個男人。

「咪玩佢啦，Andrew! 而且...今日我哋有個新朋友喺度。」

全部人嘅目光投向我...