我鍾意咗我親生姐姐，但係佢已經有男朋友？！: 成功？失敗？

「啊！屌屌屌屌！垃圾機，害人不淺，仲話分享喜悅，我分你老母。」

家姐忘我咁喺條街度發脾氣，「唔好嬲啦，唔好嬲，一陣間比人post上YouTube, 你就唔荒唔喜悅。」

佢一嘢踩落我隻腳度，「一日最衰都係你，頭先點解唔幫我啫，搞到我夾唔到啦！點解你要去廁所啫，搞到啲人望住我勁緊張。」佢委屈咁望到我實一實。

究竟頭先發生咩事？就要講返三十分鐘之前...

「不如比我試吓啦！睇嚟都唔係咁難啫！」家姐自信滿滿咁拍曬心口。佢胸有成竹咁，完全唔似一開始「畏手畏尾」嘅「弱者」。





以完全唔輸比夾公仔高手嘅速度，「嘟」一聲拍咗張卡，再以疾風迅雷嘅速度操縱住臂手。

（..突..突..） （公仔機啟動聲）

見佢咁有自信，我就去轉廁所，「咁我去一去廁所先，你加油啦。」

不過我估佢應該都唔會夾到㗎啦，冇計，係我呢個「現代嘅亞森羅平，神代嘅福爾摩斯」出手嘅時候。我靜靜雞沖去另一部號稱「絕淵要塞」嘅機度。呢部機係我覺得玩過咁多部入面最難嘅。如果用古代嘅武將黎形容，家姐嗰部係明智光秀，我呢部就係第六天魔王，織田信長。

由於呢部機太難，都冇咩人會挑戰佢，所以我排都唔使排就可以直接玩。「睇吓先！善逸..係邊個呢。」啲動畫角色個個都差唔多，搞到我搵咗幾分鐘先搵倒。





「ok! 搵到了！」

只係呢部「魔王」實在係過於強大，就算係我都有些少吃力。我要不停換角度先可以睇到咩位係啱。個公仔仲要放到鬼死咁高，要掂倒佢完全唔易。

「屌..又係咁。」

個夾係咁搖，根本冇得計好角度㩒落去。我又唔可以宜家放棄，一定要送隻公仔比家姐。連飲奶嘅力都用埋，我係咁chok個夾，諗住撞佢落嚟。

「屌啦！求下你跌啦。」





手上嘅錢越來越少，卡面顯示得返二十蚊。得返4次機會，今次真係瀨嘢了。我抱住絕望又崩潰嘅心情係咁chok個夾，希望最後可以用誠意打動上天，叫佢將個善逸打落嚟。

十五蚊..十蚊...五蚊...

到最後一次，我真係無能為力，唯有鳩fing fing希望奇蹟會發生，我用盡全身嘅力，將神經迫到極限，希望可以突破固有定律，整跌「善逸」。

「...」「..」

「....」

果然皇天不負有心人，佢將勝利獻咗比部機。到最後，我都係夾唔到。

「屌...四百蚊都夾唔到，屌你老母！」當下真係好想打爆部機，不過我忍住左，如果唔係比人black list咗就仆街了。我捱落去部機度，放鬆全身，準備整頓自己就去接家姐。

「啪！」一聲，





善逸就係咁毫無先兆跌咗落嚟。

「...」
「...」
「...」

「好過冇..」不過結果係拎到嘅，都叫做目標達成，下一步就比個surprise家姐，睇吓佢個開心樣。

————-

「請你離開呢度，你唔好再撞部機啦！」

一返到去我竟然見到有保安圍住我家姐，「屌！你啲機呃人嘅，都穿唔到過窿。」家姐起勢係咁踢部機，好似見到殺父仇人咁。





「你再係咁，我哋唔排除會報警。」

一聽到報警，我就有啲唔好嘅預感，九秒九飛過去拉走家姐，「唔好意思！唔好意思！我哋宜家走架啦。」頭也不回落返一樓。

————-
「啊！屌屌屌屌！垃圾機，害人不淺，仲話分享喜悅，我分你老母。」

件事就係咁，之所以咁嬲就係因為夾唔到「善逸」。

「你去咩廁所啫，你唔去就夾倒啦。」佢越踩越大力，仲怪返我轉頭。不過冇計，由細到大佢都比人當成公主咁，縱壞曬。

「咁你都唔使發脾氣架，一陣間比熟人見到咪柒囉。」

我將「善逸」遞上，「嗱！唔好嬲啦。」





家姐由嬲到仆街即刻變臉，表情轉換仲快過奧斯卡影后。「！你幾時夾架？」佢當堂嚇一跳然後得啖笑。咁梗係啦，我去咁耐「廁所」就係為咗佢呢一下笑。

「頭先去廁所見到佢就跌咪順便夾埋。」

「...」

「噢～係咩？」佢抱住善逸，陰陰咀笑，「仲以為你特登夾比我添！」似乎已經睇穿我意圖。「對唔住..頭先唔應該踩你。」佢嘅切換真係好快，宜家又變做乖乖女模式，今次仲有啲慚愧，好鬼死得意。

「唔緊要啦，咁我哋之後去...」我見氣氛咁好，就嘗試...