《彌留喺人間嘅罪名》: 《彌留喺人間嘅罪名》 - 《第三幕 地對人審判法》

《彌留喺人間嘅罪》 - 《第三幕 地對人審判法》

「喂喂喂，你地等等先，講咩跑馬跳舞啊？」
「前排跳舞群組單嘢已經搞到我哋地府多左好多嘢做架喇，你哋仲要講出嚟攞景定贈興呀！真係嚴命長架喎！」
「同埋閻君兄係同你哋講你哋被罰彌留係人間嘅罪名係青春，問你地明唔明白啊？」
「而唔係叫你哋以青春為題自辯演講啊！」
「搞咗我哋成日，究竟你哋知唔知道自己已經死左㗎！」黑白無常先後出聲叫停咗呢幕荒唐而又胡鬧嘅自辯演說。

然而，彥凌知道自己並唔係一個搞笑嘅人，佢好清楚自己處境，佢對自己嘅死可以話係已經深思熟慮到冇得再深思熟慮嘅地步，
而佢哋已經彌留咗喺人間一段唔短嘅時間，佢好想了解清楚判罪嘅基礎同準則，所以先申請重審。





旁聽待審嘅一班小鬼浮游係審判殿嘅陰暗處竊竊私語：「呢幾個死𡃁仔，都真係唔識死架喎！」
「閻羅王一向都唔鐘意尐搞亂生死名冊次序嘅衰鬼架啦！」經常為見閻王而申請重審嘅女鬼噉樣講。
「嚇鬼咩！如果唔係呢排果隻噉嘅病毒喺度搞三搞四搞死噉多人，成個地府又會做到踢晒腳喇喎！」
「無論你係後生定係老嘢，佢都算係一視同仁架喇！」喺地府打咗好多年工嘅男工友鬼噉講。
「但係唔好話尐後生啦，我呢尐老鬼都唔太明喎！咩叫罪名係『青春』啊！」老鬼真心唔明白。
「噉即係『青春』都有罪呀！」後生鬼直頭想挑閻王機。

而審判殿嘅喧鬧聲亦因此而愈嚟愈大，大到好似人間道街市賣菜咁，閻王終於忍唔住以低沉而又洪厚嘅聲音嚴肅噉怒叫一聲：「大家肅靜！」





然後佢揭咗一揭本《地府對人間道罪行名冊簿》，翻到去有關自殺果個欄目，終於搵倒「青春」呢個罪行。
佢指住本簿，字正腔圓噉向大家朗讀：「根據《地府對人間道審判法案》入面規範嘅罪行名冊，第七章二百一十六條，
清楚列明『青春』呢條罪行，泛指所有未成年人士以自我了斷的方式蓄意使自己死亡嘅行為，亦諱稱為尋短或輕生......」

「鬼唔知咩！咁未即係同我被判果條罪一樣囉！咁點解我要去枉死城，而佢地幾個豆丁可以彌留人間架，唔公平喎！」
現場有一隻死唔眼閉嘅老窮鬼，巴屎閉到閻王嘅說話都夠薑打斷，仲喺度大吵大鬧！
「我都想彌留翻喺人間睇下個衰女同衰婆搞咩嘢，死左鬼噉耐都唔燒d金銀衣紙黎洗下，搞到我生前死後都係一隻死窮鬼！」
窮老鬼明顯心有不甘。「你個死老窮冷靜尐先啦！」黑無常心忖。

樂霖見「民情洶湧」，隨即加多把口：




「係囉！係未亂判架？我點睇都係枉死啦！尐網民都話我係枉死架喎，應該我去枉死城先啱㗎嘛！罰咩我彌留唧！」
樂霖打開智能電話入面嘅臉書留言比眾鬼睇：
「佢唔係自己跳落去架，佢係被政權推落去架」、
「剩返落嚟就等我哋呢班大人幫你撐落去」、
「就等我哋仲在生嘅人，努力實踐你嘅遺志啦！」
「但對未成年人士嚟講，彌留已經算對係比較好嘅刑罰。」白無常默念。

子杰見勢色唔錯，不甘示弱噉加多句：「未係囉！況且我都已經成廿二歲人啦！又點算未成年人士啊！」
黑白無常見勢色唔對路，終於忍唔住出嚟開口解話：「大家靜一靜！聽我哋講兩句先！」

黑無常話音未落，白無常就已經緊接住講：
「首先，容許我哋向陳子杰同梁樂霖兩位解釋翻有關『青春罪』與『未成年』係地府嘅定義先，
根據《地府對人間道審判法案》入面嘅釐清條款及細則，就有對該兩項名詞有著非常嚴格嘅定義。」

此時，黑白無常兩位不約而同喺呢個位置停頓落嚟並深深噉吸咗一大啖氣，




然後再一氣呵成、同聲同氣、十分有氣勢噉讀出以下定義：
「『青春罪』- 泛指所有思想行為幼稚不成熟而因各項原因導致自身死亡卻又陽壽未盡並超過或達到十年陽壽以上的未成年人士。」
「而『未成年』則泛指所有未到『而立之年』的任何靈魂。」黑白無常非常滿意自己嘅解說，
而喺審判殿嘅在座每位都聽到一頭霧水，個個都黑人問題噉嘅樣。

除左一個人，佢就係陳子杰。

tbc待續 
全文在https://www.penana.com/story/73935

喜歡可追蹤我的IG/FB
https://www.facebook.com/sylvansstory
https://www.instagram.com/sylvansstory/