妳八歲當天 已是我偶像: 緣份到了

我大佢兩年，係小學三年班嗰陣時我插班入去，點解大佢兩年都會一齊讀到同一級？唔係我成績差啊，而係因為我曾經去左大陸讀左兩年書，所以返嚟香港讀小學要冧返兩年，如是者，就係一個咁嘅機會，我同佢入到同一級、同一班、3G班。

就係見到佢嘅第一眼，我就已經中意佢，因為我真係覺得佢好靚，真係可以話一見鍾情，我都唔知我太早熟定咩啦。。。年輕細細話中意人。

講返我呢就係班上面最曳嗰堆，而佢係最乖，讀書又叻，重要係我地女班長，簡直天淵之別，亦都係呢個分野，我就覺得佢一定唔會中意我，我就偷偷咁暗戀佢。
想拉近距離，我就係班入面整古做怪，但換嚟嘅只係佢呢個女班長”責名”落黑板度，重會因為咁而冇左小息去玩嘅時間，但我唔介意，因為我好中意俾佢大聲叫我，之後我就繼續奀皮，等佢忍唔住就會寫我號數落黑板，至少佢注意到就夠啦，當然啦我個號數基本上日日都係黑板度出現，但除左日日俾佢責名之外，都冇咩交流，直到開學個幾月左右就到萬聖節嘅時候，發生左一件事，令到我第一次真真正正咁同佢有單獨嘅交流機會。。。