妳八歲當天 已是我偶像: 偷功課事件

萬聖節就到，就點少得有萬聖節作為題目嘅功課啊，當時英文功課就係正正要我地畫一幅同萬聖節有關嘅畫，之後再用去介紹自己嘅作品。挑！功課老實講，我就出名係欠交大王嚟，基本上由三年級到六年級係喱個項目上面係榜上有名！(好孩子不要學)到老師改好曬派功課嗰陣時，明明冇交嘅我，英文科長竟然派左一份得到好高分數嘅功課俾返我。
嗱！嚟度呢度就要講一講點解啦。係因為我同佢嘅英文名只係一字之差，我叫Louis，佢呢就叫Louisa。
我知你地諗咩，以為我因為暗戀佢而突登去改？其實我係5歲嗰陣，我老媽子就幫我改叫Louis，本身就叫Thomas嘅，不過奈何我細個串嚟串去都唔識，就改左叫Louis。所以我覺得同佢其實真係天俾我嘅良緣。
入返正題，當時我手上面攞住本來係屬於佢，又得到最高分嘅功課，我打開嚟睇一睇。佢畫嘅畫真係歷歷在目，記得佢係畫左一個騎住飛天掃把嘅女巫係天上面，下面有南瓜、墓碑、旋轉木馬。本來已經好中意佢㗎啦，再見到佢交埋神級表現嘅功課，佢已經係我心中升華到女神級。
本來我就諗住舉手同英文老師Miss Leung講派錯左想俾返佢，但一見到Miss Leung個樣，我內心就好掙扎。因為Miss Leung 佢個樣好撚悪，成個長毛梁國雄咁，唔係講笑，係真係餅印咁，甚至我覺得佢地有血緣關係嗰隻，大家又姓梁喎咁啱。試問下有邊個小朋友見到咁嘅老師會唔慌先得㗎，更何況我冇交功課，我覺得一定會俾佢屌到上天花板，於是乎我做左一個好錯嘅決定。。。
我攞住佢份功課，即刻係個位用擦膠擦左佢個名，再擦埋入面佢幅畫，之後求其畫左啲唔知咩上去就當正係自己嘅功課，咁當然紙就包唔住火啦，我以為大步檻過，佢舉手就問Miss Leung點解冇左自己嘅嗰份，咁Miss Leung就問我地有冇攞錯，我當然蛇咬都唔認啦，改到鬼五馬六咁。突然之間，佢竟然無啦啦問我攞幾多分，隔離位個同學又唔知死驚嘆咁 ”嘩！你竟然攞咁高分嘅？” 結果可想而知啦，平時功課都冇交過份嘅我竟然攞高分，你信唔信啊啦？之後嘅過程係面臨住三位訓導主任嘅審判，雖然我認罪，但都判左我一個小過同要見家長，但比起上嚟，我更怕嘅係Louisa佢嬲我，係佢眼中印象更加唔好。的確佢係嬲左我，事發後我都冇再去撩佢傾計，我同佢講嘅最後一句話，就係三位訓導主任面前同Louisa講嘅”對唔住”

就係咁過左幾個月，當然我重係一樣咁中意佢啦，但只係我冇膽再去撩佢傾計，聖誕聯歡會嗰陣對於我地小學雞嚟講係好開心嘅日子，我都係冇膽同佢講一句嘢，淨係夠膽一直背後跟住佢，影相就整下佢牛角咁。直到新年假期前夕，我地班主任做左一樣嘢又拉近返我同佢嘅距離。