《我的MK妹同桌》第二季: 254

由嗰次見面後，我哋由短暫而緊密嘅聯繫，變成隔一排先覆一次。
 
果然，交俾時間可以幫你做到決定。
 
我無乜點去理我同呀詩之間嘅關係，自從嗰邊見返後，心囉囉攣咗幾日，明白自己依家都做唔到啲咩嘅時候，亦都慢慢習慣咁樣嘅節奏。
 
真係㗎，混亂係好人之常情嘅事，但自己需要整理返自己嘅狀態、思緒、情感。
 
時間會話你知個感受，你係仲有嘢嘅，你會頂唔順，係無嘢嘅，就一路都係咁。
 




甚至乎自己思考完，就會知應該要點做。
 
我同呀詩，已經係普通朋友咁樣相處緊。
 
我嘅生活，始終如一，亦無新對象。好似人越大，就越難識到新嘅人，更加傾向隨緣吧。
 
幾個月好快就過，日子開始忙碌起嚟，畢業嘅季節，身邊啲同學都陸陸續續搵緊工，有啲已經有消息。
 
自己都開始急起上嚟，原來見身邊啲人開始向前行緊嘅時候，自己原地踏步，就唔想俾人掉低，想跟上大隊。
 




所以自己係臨畢業嗰排，都開始搵工，而我自己呢排都迷茫緊，自己究竟想做咩呢？
 
可能有人奇怪，呢啲唔係應該讀之前就大約知㗎啦咩？
 
只係我之前會俾心機，想向前行，都係有呀詩係度，當依家得返自己嗰陣，要思考自己想做啲咩嘅時候，我就企咗係度。
 
又好似無特別明確嘅方向，對呢科係有興趣，但談不上有熱情，我依家搵都係搵返呢行，只不過無辦法全心投入去做姐。
 
身邊啲同學胸懷大志，先不論有無能力做到，至少佢哋係雙眼發光，有動力、有目標咁去做。
 




係呢方面，呀詩一直都清楚過我好多⋯⋯
 
我只係當呢樣係一份工，而唔係自己有心想發展嘅嘢。
 
最終我係臨近畢業嘅季節，靠住intern嘅加成，有個唔錯嘅offer。
 
interview嗰陣我驚到仆街，前一晚都瞓得唔好，幾乎每次interview都係咁，in咗幾份，都算係咁。
 
不敢想像自己要做社畜了。
 
後面啲堂唔多，差唔多上曬出成績，剩低啲就得返畢業禮。
 
其他學校都陸陸續續搞緊畢業禮，我係ig見有啲fd都post緊畢業相，甚是快樂。
 
我都收到呀詩嘅whatsapp。




 
「Hey!!有無興趣嚟我畢業禮啊？」佢加咗個四方帽嘅emoji，覺得佢面對我哋兩個嘅感情，係對比之下，顯得更落落大方。
 
更估唔到嘅係⋯⋯會係佢問我先。
 
事關我仲猶豫緊叫唔叫佢好。
 
屌！男人老狗咁婆媽，我心入面屌咗自己一句。
 
「好啊！幾時邊度啊？」
「我嗰個你都要嚟喎！」
 
我順道邀請埋佢。