《我的MK妹同桌》第二季: 253

我同呀詩忽然又熱絡咁傾返，停唔到落嚟，但無幾耐呀詩就無再覆過我，而我仲痴痴咁等緊佢。
 
嗰一剎那嘅錯覺將我拉返嚟現實。
 
係⋯⋯我哋已經分開咗，好矛盾，個感覺好混亂。
 
你話係咪仲有留戀，仍然仲係愛住？似乎又唔係，但關於佢嘅事依然在意。
 
感覺自己都仲要時間去思考下對呀詩嘅感覺，其實係咩一回事。
 




呀詩隔咗好耐先覆我，已經過咗頭先重遇，熱絡嘅對話。
 
接住落嚟嘅日子，我有keep住同呀詩慢慢咁傾偈，唔密，佢亦都唔抗拒，而且我哋都無提到之前嘅事，好似大家都有默契咁，想對以前嘅事隻字不提。
 
佢都忙緊實習，佢將個實習留咗係最後一年，就算係放緊假都好，佢都係要keep住實習，每日都忙到七彩。
 
佢同係英國嗰陣一樣咁忙，唔知點解，我唔夠膽問呀詩嘅感情狀況。
 
我好怕，怕我聽到我唔想聽到嘅答案，然後我會唔知點算。
 




嗰種唔知⋯⋯係唔知聽到嗰陣，自己究竟會係咩感受。可能聽到之後無乜事，坦然了；可能仲心有牽掛，聽完之後不是味兒；可能因為佢話無其他感情嘢，我會鬆一口氣？然後又有其他期待？唔知呀詩對我係咪仲有⋯⋯？
 
無論係邊一種，我都害怕。
 
係即使連重新開始，我都害怕。
 
害怕再loop，害怕再經歷多一次，亦無咁嘅自信可以之後都行落去。
 
每次係臨轉換新一個階段嘅時候，我哋都係捱唔到過去，都係分手收場。
 




所以我最近都好混亂，我需要冷靜去諗下，自己要點樣面對呀詩，同埋自己究竟係咩感覺，想要啲咩。
 
我同呀詩，係咪真係有做返嘅朋友嘅可能？