《我的MK妹同桌》第二季: 252

我架車直駛上高速公路，放眼看去係成個維港，日落緊嘅咸蛋黃照靚成個維港，我仲係頭先個畫面意猶未盡。
 
我手機震一震⋯⋯
 
呀詩已經即刻WhatsApp過嚟，佢嘅稱呼已經俾我改咗，有以前專屬名嘅佢，係英國飛返嚟香港嘅途中就俾我轉咗。
 
就咁普通一個名：呀詩。
 
我拎起手機睇嗰陣仲要諗一諗呢個邊位嚟，但佢搵我嗰陣我個嘴角忍唔住跳動。
 




「點解你係度嘅？」呀詩問我。
 
估唔到佢會主動whatsapp我，我完全無諗過，中學嗰陣分開，再相遇返都係一件叫人措手不及嘅事。
 
呢次傾返，有種見返老朋友嘅感覺，因為有先前嘅對比，此刻嘅感覺先至強烈。
 
中學考完DSE嗰陣，依然有好多不捨、執著、想同呀詩再一齊返，無辦法接受呀詩就咁係之後日子都消失咗，先造就嗰陣嘅衝動。
 
但係今次⋯⋯安心嘅感覺湧上心頭，而唔係斷斷續續嘅不安與忐忑。
 




「我去買聖誕禮物咋嘛，等人中伏。」我秒覆佢。
 
「咁你呢？」其實我想問佢，最近點？仲有無唔開心？仲有無覺得大壓力？
 
「啱啱買完嘢姐。」佢覆咗個笑喊嘅emoji俾我，感覺上佢好似開朗咗咁？
 
本來呀詩嘅性格就比較開朗，喺係英國嗰陣鬱鬱寡歡姐。
 
「你幾時返咗嚟㗎？」我問返佢，實在太多嘢想問啦，我成程車就不停咁覆佢。
 




「暑假嗰陣囉，我都要搞實習啲嘢。」
 
呀詩個look都變唔少，變得有少少港女look？但又偏文青。MK妹？完全睇唔出啦已經。
 
新識嘅朋友仔問起我啲感情史，個個都好驚訝我竟然會同MK妹一齊過，而且仲一齊過咁多年。
 
佢哋話睇唔出，我個樣咁老實，同MK妹拉唔上邊，成日俾佢哋攞嚟笑。
 
就係呢班玩交換禮物嘅一伙人。
 
呀詩又剪短咗頭髮，佢之前都有剪短過，但係今次更加短，以前嘅佢頭髮有返咁上下長，瞓教成日都會俾啲頭髮整襯，依家爽朗好多。