《我的MK妹同桌》第二季: 251

年尾嘅時候，Asso嘅同學仔諗住搞返個聖誕party，大學無乜朋友，反而asso識嗰班keep得仲好啲，咁佢哋話要玩交換禮物喎，每逢呢啲時日就好多呢種活動，只不過中學嗰班搞咗一兩次之後，就無乜聲氣。
 
都明嘅，大家圈子唔同咗，都唔係成日夾到時間，同埋開始有啲人幾次嗌佢都無出席，明顯地佢都唔太想參加呢啲中學聚會，我哋之間只不過係過客。
 
呢啲嘢唔需要講出面都明白嘅。亦無特別強求畢咗業之後一定會常聚啊，呢種諗法過於天真。
 
一年一年咁篩選身邊嘅人，仿佛好似定律咁，每個人都會經歷咁。
 
我出完銅鑼灣買禮物，準備好份膠禮物俾班仆街仔，屌你我次次都抽中伏嘢，我第一年仲要送得好好㗎，我依家唔會咁做㗎啦。
 




目標係可以用份最膠嘅禮物換人哋一份好禮物，就算換到伏都無蝕啊。
 
我買完禮物就返屋企，因為都無特別約人，諗住返去打下機煲下劇，享受埋最後一年大學生活，下年出嚟做社畜就未必有咁嘅時光啦⋯⋯
 
我如常地搭巴士返屋企，搭條快線，因為架車會上高速公路，好快就會返到屋企。
 
基本上我依家只要搭巴士，我就會揀坐車頭，不過條隊比較多人，我都預可能無位坐車頭㗎啦，點知我上到車，去到上層，大部分都full咗嘅情況下，車頭仲有個埋邊位俾我坐。
 
不過坐最出面嘅係個呀婆，仲將個手袋擺係入面個位度，心諗：哇你都幾撚無品喎。
 




「唔好意思。」我講完之後，佢先識拎返走個袋。
 
大佬啊，呢個站咁多人上車，你咁都要霸鬼住？
 
我坐低之後，就聽住歌睇風景，我甚少一邊搭車一邊玩手機，多數都係聽歌睇下風暴或者瞓下教。
 
但就係過兩個站，係我毫無心理準備之下，嚇著我。
 
係維園出面，隔離亦都停咗架巴士。
 




同樣嘅位置，佢亦都坐係車頭，一個熟悉嘅身影。
 
一開始我都無為意，不過慢慢開始意識到個人咁熟口面嘅？通常只會望一眼就由佢，但係今次一望，我就定咗係度。
 
佢側身咁望住前面，車頭嘅風景好廣闊，呢個係佢話俾我知嘅嘢，所以佢好鍾意望風景。
 
當我見到佢嘅時候，我好想嗌住佢，但係架車度佢唔會聽到。忽然間我有種衝動好想落車搵佢！
 
就算我唔知應該同佢講啲咩都好，但呢個係竟然係我第一個諗法。
 
望過嚟啦⋯⋯望過嚟啦⋯⋯
 
我心裡面不停祈求。好想俾佢知道我就係度，我就係你對面，估唔到會係呢種方式遇返。
 
然後呀詩緩緩轉個頭，我哋架車停係前面，眼見就嚟轉綠燈，我都好心急。




 
最柒嘅係⋯⋯我揮埋手添⋯⋯屌啦星。
 
呀詩先見到，我哋嘅視線終於對上。
 
佢先係錯愕咁望住我，然後笑起上嚟，係嗰個該死嘅笑容，熟悉嘅記憶。
 
然後我哋就咁係度笑，佢對住我做口型，我略略睇得出佢係問：點、解、你、係、度、嘅？
 
我都未答得切，架車就要開走，我眼前嘅畫面開始郁動，我知道我架車要轉左，而呀詩架車係向前行。
 
呀詩眼見我架車要轉走，要消失，然後係度同我揮手say bye bye。
 
我視線始終離唔開佢，直至大家個畫面都消失。