《我的MK妹同桌》第二季: 248

「嗰陣見到咁我都好傷心，係⋯⋯我係乜都無做，只不過嗰陣搵返佢，又有咩意義？出於同情？然後呢？又再傷害多佢一次？」
 
「有時溫柔都會傷害到人，無情未必絕情。」子晴最後嗰句，有啲MK嘅味道，由佢把口講出呢啲說話，又幾滑稽。
 
「你咁講都啱嘅，我以為你嗰陣對蕃薯仔已經無其他諗法，同埋唔知你會唔會覺得佢廢，嗰陣我係有咁諗過。」我都老實當年嘅睇法，咁依家已經推翻曬啦。
 
「點會呢。」子晴緩緩一笑。
 
「我之所以咁樣講，唔知你會唔會好似蕃薯仔咁樣，畢竟我哋嘅經歷都有啲似。」
 




「放心啦，呀詩佢唔會覺得你廢囉。」子晴揶揄我，條友最尾個嘴角，係度陰陰嘴笑。
 
「屌你啦。」我串返佢，績道：「我又無諗到會好似蕃薯仔咁嘅，佢嗰陣真係愛得你太深，嗰種狀態我同呀詩第一次分手都試過，係唔好受到自己都控制唔到。」
 
「但依家已經唔係咁，呢段經歷會伴我一世，隱隱約約咁浮現，抹唔走。」
 
「唉，諗下諗下又好似真係同你哋嘅經歷差唔多，又唔係因為鍾意上第二個，而係因為大家追求嘅嘢唔同，分開對大家嚟講都輕鬆啲。」
 
「嗯，你知啊呢？」子晴得戚咁講。
 




「總之你呢，有咩覺得唔開心嘅，就搵我傾啦。」
 
大致上感情嘅嘢傾嚟傾去都係嗰啲，我同子晴傾完之後，我都舒服啲，因為自己一個嗰陣，會自己揣測一啲嘢，然後落一啲定論，簡單啲嚟講姐係FF，依家起碼安心咗一啲。
 
食完餐飯，我同子晴傾偈亦都密咗啲，我哋都唔係會成日約出嚟，各自都有嘢要忙。
 
我都要去一間公司度實習，蕃薯仔有約過出嚟，意外地佢成熟穩重咗，之後強裝爛玩嘅姿態亦都唔見咗。
 
知道咗佢有女朋友，聽佢講個女仔都對佢唔錯。
 




好自然咁覺得唏噓，好似啲事會出乎你意料咁交叉行走，時機總係咁巧妙。
 
我無同佢蕃薯仔講子晴嘅事，當然嗰番說話都無講啦，就由佢成為石沉大海嘅祕密啦。