《我的MK妹同桌》第二季: 249

我自己都開始慢慢地俾生活侵蝕緊，一個暑假話咁快就過⋯⋯
 
實習嗰陣有個一齊入嚟實習嘅同事，大家都差唔多年紀，女仔嚟。成間公司實習係得兩個人，就係我同佢。
 
一開始大家都好靦腆，怕怕醜醜咁啦，我只係想和平咁相處，同埋提前體驗一下返工生活。
 
「Hello，Eric，我係Emily啊。」呢位同期嘅實習同事主動過嚟搵我，我哋都各自坐係老細前面，慘到仆街⋯⋯都無得蛇王。
 
Eric係我返工嘅英文名，諗住返工之後換個正經易叫嘅英文名算。
 




形容下眼前呢位同事先，佢係可愛型，雖然身高唔算好嬌小，但佢整體俾人嘅感覺偏柔弱。
 
「係，咩事呢？」我客客氣氣咁講。
 
「想問下你陣間會唔會想一齊食lunch姐？」其實我心入面都諗緊好唔好約食lunch嘅，始終都覺得需要同同事聯繫一下感情嘅，但忐忑緊我去問會唔會俾人覺得狗公咁⋯⋯
 
就係我猶疑緊嘅時候，佢就過嚟問我啦。
 
「好啊，無問題啊。」我都好爽快咁應承咗。
 




睇到呢度，大家唔好誤會我同同事有路，戴定個大大個嘅頭盔先，係乜嘢事都無。
 
開始知道同事係咩一回事嘅時候，就有好多你唔想了解嘅事，逼住你需要慢慢了解。
 
咁當然，我對佢無嗰一回事，我仍然未準備好開始一段新關係，而同Emily食飯嗰陣，都feel到佢對我有拉開一段距離，都明顯地表明咗立場，分開咗同事之間嘅界線。
 
亦都知道佢本身係有男朋友，因為佢嘅wallpaper係佢同佢男朋友嘅合照。
 
我哋傾嘅多數都係公司裡面嘅嘢同埋八卦，同埋講下大家啲背景。我哋實習期好短，個半月左右，而且返工嘅時間都唔係多。
 




完咗實習之後其實都無乜點聯絡，唔止Emily嘅，其他同事之間都係築起一個包圍網，各自有自己生活，唔會咁輕易俾人介入自己嘅生活，有別於學生時期，唔會咁輕易築起個牆，好容易就打成一片，無乜隔膜。
 
踏入社會嘅第一課就係要保護自己，係件好自然嘅事，自然就學識咗。
 
好彩嘅係，至少我仲有year4呢一年可以好好地享受埋佢，先再畢業。
 
Year4反而得閒咗，無咁多堂，但就要趕final year project，由於asso升上嚟無乜朋友嘅我，無乜點諗grad trip呢樣嘢，但見身邊啲同學有傾開grad trip，唔多唔少都有啲羨慕。
 
諗起以前我同呀詩、子晴、蕃薯仔去台灣grad trip，嗰陣時大家咁開心，依家各散東西，就down咗落嚟。
 
Year4多咗好多時間，但摺咗好多，一個人嘅時間多咗，我開始去游水，發掘下一啲興趣。
 
游水可以自己一個都唔尷，同時係水中嘅時候好安靜，好鍾意呢段片刻嘅寧靜，可以諗好多嘢。