《我的MK妹同桌》第二季: 247

「佢係咪有女朋友我真係唔知啊，我都有一排無同佢聯絡啦⋯⋯」我咁樣覆子晴。
 
「你會唔會想約埋佢啊？」我試探下子晴。
 
「er......我無所謂啊，你約到你咪約囉。」由子晴猶疑嘅嗰一下，我就抱有疑惑。
 
「哇，你真係唔驚尷尬㗎？」我問佢，亦都無所畏懼，咩都夠膽問。
 
「都咁耐啦，仲有咩尷唔尷尬啊，不過⋯⋯」子晴略有所思咁停一停頓。
 




「不過老實講⋯⋯但你唔好同返佢講喎⋯⋯」原來子晴停一停，係諗緊應唔應該同我講。
 
我不奇然地FF係咪關於蕃薯仔啲咩呢？第一下直覺俾我嘅反應係，係咪仲對蕃薯仔有感覺？
 
我當然好仆街，亦都係官方答案咁覆子晴：「我梗係唔會同佢講返啦。」
 
屌啦，個個要八人啲嘢嗰陣都話唔會同人講啦，呃撚咗你講先㗎啦。
 
但我好明顯唔係呢種會四圍講嘅人啦，係咪先？
 




「蕃薯仔同我一齊嗰陣其實都對我好好，就算上一個男朋友都無蕃薯仔對我咁好，雖然呢啲無得咁樣講，但係心入面始終都有佢嘅位置，只不過清楚呢啲唔再係愛情，斷開咗嘅愛情唔一定修補得返。」
 
「咁嗰陣佢肯花時間等我已經唔係咁多個人做到，無足夠嘅愛係好難捱到落去。諗返起嗰段時間，真係我最難捱嘅日子⋯⋯」
 
「所以如果可以的話，我都會想同佢keep返聯絡，我無估到分手對佢嘅影響咁大，嗰陣覺得大家想要嘅嘢唔同，離開中學之後，大家想追求嘅嘢會唔同，但係蕃薯仔佢個人太念舊啦⋯⋯我知佢好努力維繫我哋嘅關係，甚至想keep住中學嗰種狀態，我唔想咁⋯⋯我想向前，我已經停咗一年啦，我只要一停又係度曬時間㗎啦。」
 
我望住子晴雙眼，係睇得出佢嘅感傷，蘊釀緊個情緒，想喊咁款。
 
「分手後我以為佢會頹一陣啦，我狠心啲，佢就可以好快走返出嚟，而且出嚟見識世面多咗，會識到其他人，或者有其他諗法，會易啲放低啦。」
 




「估唔到後尾咁長時間令到蕃薯仔變咗第二個人咁。」子晴佢停低手上嘅餐具，想食但又食唔落。