《我的MK妹同桌》第二季: 246

我知道呢句係問正子晴嘅痛楚，但我好想知，原因係我可以籍此機會大約估下呀詩點諗。
 
因為你叫我諗，我係咩都諗唔到。
 
「睇到時情況點啦，可能再遇返，大家都仲唔keep住有感覺啦？有人嘅情況係分開咗之後就已經死心，唔會再有機會返撻，但有啲係仲有保留，通常分手嗰陣仲有依戀。」
 
「我對蕃薯仔係後者嚟，我會有保留空間囉，但唔勉強。」子晴講呢句說話嘅時候，我覺得有啲怪怪地。
 
後來細心一諗，我知怪嘅位係邊。
 




「你男朋友知唔知㗎？」印象中子晴係拍緊拖㗎喎。
 
「我同我男朋友散咗啦。」子晴又講啲爆嘅嘢。
 
「下⋯⋯幾時嘅事？」
 
「個令兩個月前咋嘛。」子晴氣定神閒咁講，已經唔係問佢有無事嘅時候，過撚咗了。
 
「搞到我嚇一嚇，咁⋯今次又因咩事散嘅？」自己fd啲消息開始知得越嚟越慢，已經唔再係第一手知道嘅人。
 




「無嘅，大家嗰方面唔夾⋯⋯而且佢都有出去搵第二個。」短短幾句看似交代咗成個故仔，但係當中skip咗好多嘢，好多辛酸嘢⋯⋯
 
我一時語塞，唔知點接落去好，驚問深啲又好似唔識做咁。
 
「咁你有無搵蕃薯仔？」
 
「啊唔係⋯⋯應該咁問，蕃薯仔仲有無搵你？」
 
「無好耐啦，睇佢ig好似都有女朋友啦。」子晴呢句，有些許嘅醋勁，至少證明子晴仲在意蕃薯仔。
 




本來想問子晴關於呀詩啲嘢，傾傾下反而更加想知多啲子晴嘅現況。
 
人生真係好迂迴曲折。