《我的MK妹同桌》第二季: 245

佢一句就同我講話：「哇，你望落咁頹嘅⋯⋯」
 
雖然我都知，但聽完之後打擊都幾大。我笑一笑回應咗子晴，算係一種默認吧？
 
「你仲放唔低呀詩？」子晴啱啱坐低係餐廳，第二句就係問呢個。
 
我唔知笑定唔笑好，唔識反應，我明子晴問都係唔想避而不談咁，反而仲尷尬，仲更加唔舒服。
 
而且我出得嚟，我都預咗會傾呢個問題，先至會選擇出，如果唔係根本唔會約得成。
 




我個心仍然仲有呀詩嘅影子係度，我亦都想同其他fd傾下呢個問題，可以聽下啲有用嘅意見，究竟我應該點做？
 
「未啊，唔知點先可以放得低，我唔識啊⋯⋯」
 
「你有無同呀詩聯絡啊？我想知佢依家點⋯⋯同埋我都想知佢其實點諗。」我真係厚顏無恥咁問㗎啦。
 
「有啊，點會無聯絡啊。」子晴睇緊餐牌，一邊答我。
 
「其實呀詩都有問下你，你哋兩個真係如出一轍，你哋嘅事我都有聽講過，我明白你哋嘅無奈，亦都覺得好可惜⋯⋯」
 




「而且我哋幾個啲關係，好似都返唔到去從前，我同蕃薯仔啦，依家到你同呀詩。」子晴低頭睇餐牌，雖然睇唔到佢表情，但句句說話都好感慨。
 
佢講得啱，好似真係返唔到轉頭⋯⋯除非我哋全部都各自無嘢，先至可以再次出嚟，都保持住歡愉嘅氣氛吧？
 
「都係，唔知要幾耐先可以無事呢？到時候我哋出嚟，可能都各自有另一半呢？」我苦笑著。
 
我不敢想像。
 
子晴終於望住我，原來係想問我食咩，我哋落完單，子晴仲記得頭先個話題。
 




「到時候一講返當年嘅嘢，就大把嘢講㗎啦。」咁佢又講得啱。
 
「咁你聽完之後，你覺得點⋯⋯我應該點做先好⋯⋯」我忍唔住開口問佢了。
 
子晴思索咗一陣，佢先講：「其實都無乜辦法，始終呢個係佢想要嘅結果，佢唔想拖累你，再加上佢都處理唔到自己情緒，佢讀社工係需要接受好多負面情緒，唔一定個個都消化得到，佢一時之間要面對太多嘢啦。」
 
「佢咁樣嘅選擇未必會令佢感到開心，但至少無咁大負擔同埋內疚先囉⋯⋯」
 
「將來你哋真係仲有心嘅話，話唔定會再好似之前咁一齊返呢？亦都可能唔會，都唔一定。」
 
「選擇等，或者唔等，都無乜問題，唔好睇得咁重，唔好expect人哋會等，亦都唔好排除呢個可能，仲要自己都有呢個心，咁樣先難。」
 
我感覺到，子晴呢番說話係有過一番體悟先講出嚟，佢同蕃薯仔先前先經歷過類似嘅嘢。
 
佢肯分享，證明佢都係真心想我好。




 
「咁你會唔會等蕃薯仔？」我話鋒一轉。