《我的MK妹同桌》第二季: 244

但原來唔會，忙起上嚟嗰陣，只要一停低，我個腦就會好自然咁諗起。
 
一落堂又或者返完part time，一拎起手機，好幾次就停留係打俾呀詩前嘅畫面，一切都那麼熟悉、自然。
 
呀詩一早已經成為我嘅反射動作。
 
呢段日子，過得特別漫長。
 
每日都有嘢做，但每日都感覺過得好慢，我仍然默默咁留意住佢ig⋯⋯
 




我經歷過兩次失戀，兩次都係同一個人。
 
前一次，係天塌落嚟嘅痛；而呢一次，係長期病患。
 
我時不時都會仲諗起呀詩，不能自控咁想去關注佢，佢每一個post，都會猜想佢依家點。
 
經常心癢癢咁想搵返佢。
 
明知唔應該搵，唔可以搵，但就係會手殘。
 




佢有時都會係ig story度po啲sad嘢，黑mon，嗰邊落雨天嘅景況，啲句子都係啲鬱悶嘅文字，而歌，亦都好sad。
 
近排佢成日分享周興哲啲歌，睇嚟已經取替咗杰倫嘅地位。
 
唔知佢係咪情緒又唔好？係嗰邊過得辛苦呢？
 
我有覆過佢story，嘗試關心下佢，但佢無俾太多回應我，只係平淡幾句嘅回覆，比朋友更加陌生。
 
返到嚟自閉咗幾日，又要返學了，接住落嚟好多嘢做，我之後嘅傷心嘅時間都無。
 




唔似得中學嗰陣，仲可以任情地乜都唔理，依家唔理，會無得順利畢業，啲科又要再重新讀過，唔想再俾自己啲成績咁差，唔見得人。
 
煎熬又辛苦，連悲傷嘅權利都無，就逼住你要向前行。
 
以前係呢啲時間，我都仲可以去搵呀詩，去叉叉電，仲有佢可以撐住我。
 
依家佢唔係度，就覺得咁樣嘅狀態特別難捱，無助感更加大⋯⋯

日子如常要過，身邊嘅人開始察覺到我哋兩個好似分咗手。
 
因為我ig上面同呀詩啲合照唔見曬，我典藏咗姐，去到後來我先知原來有典藏呢一樣嘢。
 
而呀詩po呢啲story，亦同我一樣唔見曬啲情侶合照，應該盲嘅都睇得出。
 
跟住係忙碌嘅日子裡頭，蕃薯仔同埋子晴係同一日搵我，大家分別係晏晝同夜晚姐。




 
不外乎都係婉轉咁問下我點啊之類，但其實我都知佢哋搵得我會係咩原因。
 
我唔係幾想面對佢哋，唔知點答佢哋。
 
所以拖咗大半日先覆佢哋兩個，佢兩個真係咁有默契？
 
子晴就比較溫柔，蕃薯仔真係唔避忌，第一句劈頭就嚟：你分手啊？
 
真係好想煎巴佢！
 
相反子晴就借啲意講下其他嘢，問下我呢排點，有意無意咁囉。
 
點都比蕃薯仔舒服㗎啦。
 




後來同子晴傾傾下，先知佢都同佢男朋友散咗了。
 
再忙都夾咗一日約出嚟食個飯，傾下偈。
 
無可否認嘅係，我哋都唔再好似以前咁，大家約出嚟好爽快，即興約又得，幾時約都得，大家見面嘅頻率，真係好密。
 
依家要約一餐飯都係奢侈，要問好幾個日子，擇個良辰吉日先食到餐飯。
 
我哋是但揀咗間餐廳，主要睇子晴有咩想食。
 
食咩係其次，出嚟傾下偈訴苦更難得。
 
子晴同我一樣，都係忙internship嘅嘢，同埋啲功課。
 
子晴又比以前中學靚咗⋯⋯因為更加識得打扮，同埋有化妝，都幾明顯睇到個分別，但又唔覺得濃。