《我的MK妹同桌》第二季: 234

我遲疑咗，我唔識點接落去。
 
我可以用返啲巧妙嘅方法去接，但我怕接咗落去，會係一啲我唔想聽到嘅說話。
 
所以我唔識反應，加上句嘢，帶住刀刃咁插入我心。
 
言下之意，姐係我哋唔再係情侶關係？雖然如自己所料，但係當事實再次擺係面前，我仲未可以做到豁達咁去面對⋯⋯
 
「唔知仲會唔會有女朋友呢？」今次換我有意無意咁望住呀詩，直勾勾咁望住佢。
 




我都有啲想知佢會點答，心底裡預想咗佢點答㗎啦，但又暗自期望佢會答我想要嘅嘢。
 
「你之後點會無女朋友啊，實會搵個比我更好嘅，你會搵到幸福。」呀詩想個氣氛無咁尷尬，仲做埋個「加油」嘅動作。
 
佢都知自己講出嚟尷尬呢？
 
句說話酸到不是味兒，又有少少含砂影射，知佢有點不捨。
 
「我諗我唔會咁快想拍拖⋯⋯」因為我知道佢心點諗，所以我都認真答。
 




我俾返部手機佢，然後邊行邊講。
 
「拍長拖好攰，我都用唔少精神同精力係呢段關係度，我想俾自己休息下，我又唔急住拍拖，去完成自己想做嘅嘢先，享受下單身先。」
 
「我諗我好難再遇到個人會好似同你咁夾，然後亦都咁鍾意，你話遇到個比你更好嘅人？遇到個同你一模一樣嘅人都難啦，更何況比你更好？」
 
「真係㗎，你已經係最好嗰個。」
 
有陣時，做人好難，經歷過呢段感情，唔多唔少都會對下一個女朋友唔住⋯⋯
 




所以為咗唔想有呢種嘅愧疚感，等自己真係好好沈澱一段長時間先啦。
 
「都唔知係咪真嘅！」呀詩又講反話，要知佢係咪講真話，留意佢啲表情就得㗎啦。
 
我哋慢慢淡出情侶關係，喺呢個旅遊嘅尾段，亦都係我意想不到嘅事，係短短嘅期間。