《我的MK妹同桌》第二季: 233

我同呀詩去啲手信店度睇，呢條街都幾多呢類型嘅鋪頭，終於有返啲係英國嘅感覺。
 
我用啲唔咸唔淡嘅香港英文去問老闆嘢，最後都係要呀詩lead返我，佢拍拍我膊頭，淺笑。
 
無傷害，但侮辱性極大。
 
意外地，我哋今次無拖手，只係好似朋友咁，輕鬆地相處。
 
我仲未習慣呢種轉變，不過我壓低咗我內心嘅衝動。成個買手信、揀手信嘅過程其實好舒服，不過有時我哋都會無話題，就咁望下街上面嘅風景。
 




我聽日夜晚機返香港，其實仲有一日多啲嘅時間相處，但係對我嚟講，我哋嘅「旅程」已經去到尾聲。
 
係某個時候，我察覺到呀詩流露出鬱悶嘅神情，我以為有咩事，跟住又無乜事。
 
我唔清楚係咩事嘅，亦唔想追問落去，只會令人哋覺得煩。
 
可能離別嗰種，唔會咩感受、感覺、說話都可以一次過表露曬出嚟，總會藏起一部分情緒，原因可以有好多，但唔需要挖到出面。
 
「幫我影下相啊。」呀詩拎部手機出嚟，前面嚟遠係大笨鐘嚟。
 




「好啊。」我接過部手機。
 
我熟悉地幫佢個好角度，靚位，呀詩企係街上面，擺好姿勢，然後影咗好幾張。
 
相入面嘅呀詩，都仲係咁靚。
 
「你真係唔識影相㗎喎，影到我咁肥都有嘅？」呀詩用取笑嘅口吻同我講。
 
「下？咩啊，我影到你不知你靚喎，影到你腳長長咁。」我心諗，無可能！我對自己嘅攝影技術好有信心。
 




「你睇下啊⋯⋯你呢度影到我隻手幾肥，個手臂啲肉出曬嚟啦！」
 
「邊有啊⋯⋯」我望真啲，屌⋯⋯又真係有。
 
我無出聲。
 
「唔出聲姐係點啊？」呀詩終於反應過嚟。
 
「喂啊！！死人強！」
 
「咁⋯⋯咁我都無辦法啦。」我又唔識死，暗指佢肥，哈哈。
 
「你咁樣遲下點幫你女朋友影相啊？」呀詩忽然爆咗呢句⋯⋯