《我的MK妹同桌》第二季: 235

今日返到去，我哋嘅相處有種距離感，刻意地。
 
我係度執緊喼，佢又係度繼續做緊功課，而呢度聽日退房，都要執返好啲嘅。
 
臨返去前好多嘢要搞，已經去到唔搞唔得嘅地步。
 
我以為呢間房係我哋甜蜜嘅地方，我諗住係可以增進感情嘅地方嚟，呢個旅程係可以俾到安慰佢。
 
個喼度裝住好多嘅傷感，係俾我用嚟帶返去。
 




瞓教我哋都係各自瞓，我就點都係瞓先嗰個，因為呀詩又係度埋頭苦幹，中間唔知幾時先瞓落床。
 
以往我哋都會有身體接觸咁瞓，但係依家已經無，我唔係瞓得好沉，所以隱隱約約都feel到。
 
亦都知聽日就要走，我就瞓下醒下，瞓下醒下咁。
 
係鬧鐘響之前，我就已經醒咗，經過呢幾日嘅感情跌宕，我漸漸無太大嘅感覺，反而有種空洞。
 
我坐咗係個廳度，等待著時間嘅流逝，差唔多夠鐘就去整早餐，整得豐富啲，印象深刻啲。
 




嗰陣我係咁諗。
 
「嗯？」瞓到成面都係紅印嘅呀詩行過嚟，佢睡懵懵個樣可愛得嚟帶點小性感。
 
「又整早餐啊？」佢未load到機。
 
「啊！你今日飛啦喎⋯⋯」呀詩自己轉個身，見到個廳啲行李，一袋二袋同埋個喼。
 
然後魂不守舍咁係度左轉右轉，唔知佢自己想做咩。
 




「幾點啊？啊⋯⋯晏晝⋯⋯」佢自問自答。
 
「晏啲我換衫化妝先。」佢手忙腳亂。
 
「你係忙唔送我機都得嘅，不過間房就聽日先check out，所以你可以慢慢執好啲嘢先再退房。」可能有人會嫌佢傻更更，但係我眼內，係好可愛嘅舉動。
 
「算啦，我最近都慣咗斷斷續續咁樣做嘢，點都送咗你先。」