《我的MK妹同桌》第二季: 232

呀詩兜咗好耐先兜到我去佢原定嘅地方，行錯路啦，仲笑笑口咁講話個google map出錯啦，話咩分叉路指唔啱，係度同我講數。
 
係路上，我有借啲意問佢：「你依家心情有無好返啲？姐係你之前嘅情況咁嚴重，抑鬱到要食藥，我本來都無打算問，因為唔想係你面前提起呢啲事，但係我又就走⋯⋯我有啲擔心你之後唔知會點⋯⋯所以都想問下⋯⋯」
 
「我都唔知㗎，呢一刻無嘢囉，同你相處不嬲都好開心、好舒服嘅，有時就係無來由地失落，又唔知為乜而失落，我嚟到之後就成日都係咁⋯⋯你令我重拾返久違嘅開心。」
 
「但係同時，亦無形地俾咗壓力我，與你無關，係我自己俾自己嘅壓力，所以先⋯⋯」呀詩無講落去，亦都講到咁白，就係度停頓咗。
 
「我唔知之後點啊，你走咗之後我諗會打回原形，不過我自己想俾自己沈澱下，然後完成埋我想做嘅目標，其他嘅我無再諗啦。」
 




當下嘅感受，我唔知點形容，二十令歲之後嘅經歷，原來有好多嘢都係咁樣，唔識點形容，尤其是係聽到人哋嘅故事、反應、說話，會唔識點講。
 
唔係唔理解，唔明白啊，而係聽完之後，好無奈，然後又無好嘅辦法同埋意見可以幫到佢，會因為咁樣而感到惆悵。
 
有時聽到朋友唔順心嘅事、香港發生嘅事、再次面對返呢段初戀，都係有同樣唔識形容嘅感覺，無辦法用一個字詞精闢咁去解釋曬所有事，係夾雜咗好多嘢係裡面。
 
「咁你之後自己照顧到自己就好。」句說話去到喉嚨，已經feel到酸。
 
「放心啦，我會嘅。」呀詩笑著，並唔真誠。
 




去到呢一個地步，唔會再突然破鏡重圓。點解咁肯定？因為我清楚呀詩點樣諗。
 
決心已經下定，一時三五時變只會兩頭唔到岸，咩都做唔到之餘，仲會咩都做唔好，搞到一鑊泡。
 
我亦都覺得咁樣嘅決定，都係一個好嘅選擇嚟。