《我的MK妹同桌》第二季: 231

嚟到呢度，我好似都成日自己一個行街。
 
行行下，諗諗下，情緒就慢慢平復返啲，男人會越嚟越多呢啲時候，傾向自己咩都一個人承受。
 
行到無咩嘢好諗，決定享受埋剩底嘅旅程，我就返去繼續瞓。
 
瞓醒之後，呀詩如常係電腦面前埋頭苦幹，佢話留個晏晝同我出去行下買手信。
 
我自己已經係度執捨緊細軟，心裡面已經換緊另一種心態，希望可以正面啲咁樣面對呀詩。
 




因為我哋唔再係細蚊仔，唔係下下都要唔捨得，死去活來咁離開。大個嘅感情，會瀟脫啲㗎嘛，係我嘅幻想入面。
 
「就得！俾多個一陣，我打埋呢段先。」呀詩焦急咁同我講，我呢段時間聽得最多就係啲鍵盤聲，「得得撻撻」咁。
 
「慢慢啦，唔急啦，3點幾咋嘛，唔晏喎，無嘢喎。」我說話有骨，專登潤下佢。
 
「得啦！知啦，煩氣，俾我打埋佢就搞掂一份啦！」呀詩又急，又嬲爆爆咁睥住我。
 
我慢條斯理咁坐係佢前面玩手機，睇住佢，成日都激撚死佢。
 




我哋嘅氣氛完全唔似過兩日就離別，心照不宣嘅默契，係我哋一齊咁多年嘅產物。
 
「搞掂！行得啦！」呀詩得戚咁同我講。
 
「玩玩玩，仲掛住玩電話！仲唔快啲行？」佢串我。
 
「OK！」我無奈地笑笑。
 
可能我哋避免唔到離別，但係我哋可以選擇用咩方式面對離別。
 




我哋去倫敦啲出名嘅地方買手信，全部都係呀詩帶我去，而且條友呢⋯⋯
 
「你依家落到嚟先google？係英國邊度買手信好？」我笑鳩佢。
 
「咩姐！我真係無時間啊嘛。」呀詩拍我背脊，熟悉嘅痛感。
 
「你早講啊，你叫我搵啊嘛。」
 
「唔得，我講過話要帶你㗎嘛⋯⋯」呀詩有時就係咁，會有莫名嘅堅持，亦係佢可愛嘅位。
 
然後佢傻裡傻氣咁帶我跟住個google map去搵地方，而且佢自己又無乜方向感，路痴嚟。
 
跟住個google map都可以行錯方向，我想笑，但係見佢咁認真，我又收返埋。
 
心入面都打算好，就算佢帶我去邊，行錯路都好，都唔緊要，見到咩啱就買咩囉。




 
佢有咁嘅心，同埋只要一齊行就夠。