《我的MK妹同桌》第二季: 230

接住落嚟，呀詩由慢慢地哭泣，變成嚴聲抽泣。
 
更加忍唔住攬住我，捱落嚟喊。
 
搞到我都好想喊埋一份，但係我心入面只有一股股感傷，卻喊唔出嚟。
 
我明白呢種欲哭無淚嘅感覺，好唔想再經歷一次，但現實又再嚟多鑊，好痛苦。
 
所以之後我都好唔鍾意sad ending，因為每次都會令我諗返起呢一刻。我哋坐係昏黃嘅房間裡，只有呀詩張工作枱上面嘅燈照亮成間房，我就咁睇住呀詩失聲痛哭。
 




我個膊頭濕曬，呀詩偶爾抽搐著自己個身體，喊到收唔到聲，控制唔到自己身體。
 
呢一刻我就清晰⋯⋯
 
呢個就係我哋之間嘅結局。
 
至少係最後，我算係做到對自己無悔吧？
 
我唔知時間過咗幾耐，直到呀詩喊到無曬動靜，我個腦都仲係好清醒，一啲睡意都無。
 




我輕輕拍一拍佢，無都無反應，於是我將佢放返落床，我見到佢塊臉喊到好多淚痕，隻眼腫腫地咁。
 
我係呀詩額頭度印上一吻，然後我出咗去樓下周圍行，我好想自己一個靜下、諗下嘢，整理一下個情緒。
 
我拎咗少少嘢就出咗去，落到樓下，發覺得幾涼，著到薄薄地嘅我忍唔住打咗個哈痴。
 
凍凍地反而讓我更加清醒，可以專心投入咁諗我哋之間嘅嘢。
 
我求其鳩行，漫步呢個英國街頭。
 




漸漸發覺，我落嚟諗我哋嘅嘢係一件好撚錯嘅事。
 
因為諗返我哋好多以前嘅事，嚟呢到嗰幾日發生嘅事，原來無我自己想像中咁灑脫。
 
我嘅情況只會係，我唔想分開，但最後都係會分開。姐係我去到最後，就算幾唔捨得都好，我都係會做分開呢一個決定。
 
因為呀詩都做到呢個份上，呢個地步囉，我仲可以點？
 
我嘅挽留只會令佢更加不知所措，徒添佢嘅壓力，最後就算無分到手啦，都難保將來唔會有，到時我哋又loop一次？定還是每日活係誠惶誠恐嘅日子裡面，繼續相愛？
 
好似每一個選擇，都不能盡人意。