《我的MK妹同桌》第二季: 229

呀詩由怕醜變到嬲，好似俾人睇到裸體，然後無反應，仲要串串貢咁走咗去。
 
我真係好急尿啊嘛！！
 
去完廁所返嚟，呀詩坐係張床度，嬲爆爆咁。
 
個氣氛成功俾我逆轉，我柔聲問：「做咩事啊？嬲啊？」
 
佢唔睬我。
 




「講啦，做咩事嬲喎。」我再問。
 
佢都係唔睬我。
 
「係咪嬲我聽到曬你講嘅嘢？」
 
「係啊！」佢拎個枕頭遮住自己塊面。
 
「啊！！！！」然後自己鳩叫，拎個枕頭嚟打我。
 




「你幾時開始聽到㗎？」
 
「我？我由一開始就聽到啦。」我笑住講。
 
「你仲笑！」呀詩搣我，好痛，真係好痛。
 
「我真係諗住你瞓死咗先係你隔離講咋！」呀詩就係呢點太天真，又天真得可愛。
 
「咁好彩我聽到你心入面嗰句說話，如果唔係我咪無機會知？」我拎開呀詩個枕頭，攬住咗佢。
 




可能之後未必可以再咁樣攬得到，但呢啲已經無所謂，唔再重要，重要嘅係依家嘅我哋。
 
「啊！！！點解會咁㗎！」呀詩仲好介懷頭先嘅事。
 
「如果你真係如你頭先咁講，真係要放手嘅話，我會尊重你，依家我至少都明你嘅想法，亦都無話怪你啲乜，應該咁講，之前諗唔明你嘅用意吧？依家知道咗之後，我會更加想珍惜埋剩底呢一兩日，然後返去就好好地再開始過。」
 
呀詩兩行淚痕又再次補返色。