《我的MK妹同桌》第二季: 228

成個過程，我都聽到曬。
 
我大約知呀詩嘅想法係點，兩個人相處，唔會咩都感覺唔到，總會有啲蛛絲馬跡可以發現得到。
 
只不過當你聽到呀詩親口係你耳邊講佢內心嘅感受，個心係會因為跳動而感到傷心。就好似你明明都做好心理準備人哋同你講分手，但你聽到嘅當下，都係忍唔住崩潰一樣。
 
呀詩續道：「我知呢一切對你嚟講可能無辦法理解我點解咁樣做，可能仲會嬲埋我添⋯⋯」
 
呀詩跟住冷笑一聲，然後開始嗚咽著⋯⋯
 




「我唔係想話自己經歷嘅嘢有幾咁慘，依家放手有幾咁偉大，只係唔想你辛苦。你專登過嚟搵我，但係我連最基本嘅陪伴都俾唔到你，我都有諗過不如唔好做啲死人功課啦，炒曬咪返去再補返囉，問題係我唔想衰俾佢哋睇，咁樣實在太柒，話人哋攞曬啲嘢嚟做，但去到自己手嘅時候，就變成咁，所以⋯⋯所以⋯⋯」呀詩好細聲咁樣喊，最後都係忍唔住喊咗出嚟。
 
「當連陪伴都俾唔到你，我都會諗，咁樣落去仲有咩意思呢？」
 
「其實我清楚，你唔介意㗎，你打從一開始過嚟英國搵我，你就預咗，我之前都知，有陣時唔係話對方唔介意就得，好多時都係人哋唔介意，最介意嘅通常都係自己。」
 
「人哋嘅嘢，好容易就寬容到，但係自己嗰關呢，就成日都係卡鬼住。」呀詩講下講下，就瞓咗落去，我感覺到背後有重量咁壓咗落嚟。
 
「所以其實唔係你嘅問題，係我問題。」呀詩繼續講。
 




「對唔住，只要你唔好嬲我就得。」呀詩軟弱無力咁講。

我頭先都一直係度諗緊，究竟轉唔轉身好，話俾佢知其實我好想知佢心點樣諗，我爭扎緊。
 
「所以去到最後，明明都忍下心講咗分手，都好似拖住你，唔俾你走咁，其實都係因為我自私姐。係呢一步，我無諗過你點諗，我淨係想留低一啲深刻嘅回憶，因為我都唔想就咁結束。」
 
「呢個階段、呢種狀態，一齊落去只會辛苦，我的確唔想再忍，唔想再咁樣辛苦落去，我好似去到邊都係一個負累咁，由細到大都係咁。原來以為唔會再有咁樣嘅感覺㗎啦，直到你出現咗之後。」
 
「最近呢種狀態又搵返我⋯⋯我綁住咗你係度，我點會唔知你愛我姐，你卻因為咁，而犧牲咗好多嘢。我明㗎，我睇得到，但係我接收到嘅係沉重、壓力、無辦法回應嘅愛。」
 




「當你無辦法、無能力回報嘅愛，就會換轉成為痛苦。」
 
「所以放手對你我係一件舒服嘅事。」呀詩輕輕咁摸摸我個頭。
 
我最後都係忍唔住，因為我唔想好似電視啲橋段咁，咩兩個人嘅心事默默咁收埋係心底好多年，彰顯自己有幾咁鍾意對方，仲要一講就係講緊十幾年咁。
 
我一向都好唔鍾意咁，我想大家有咩心底話，都可以講清楚佢。
 
於是我做咗呢個決定。
 
我伸手去捉住呀詩隻手，然後翻身望住佢。
 
佢下意識驚到縮返起隻手，然後我見到佢個樣係呆咗兩、三秒，然後跳起身，坐咗係度望住我。
 
個樣好驚訝。




 
問：「你唔係瞓咗咩？頭先仲見你瞓到好冧。」依然吃驚咁望住我，唔識反應。
 
「我頭先急尿想起身去廁所。」我笑笑口地解釋，心諗，咁樣玩下佢都幾過癮，嘻嘻嘻。
 
「你聽到曬？」呀詩問我。
 
「我去完廁所返嚟再話你知。」然後我起身去廁所，我依家就係要佢心囉囉攣。