《我的MK妹同桌》第二季: 227

我陪呀詩去買藥，明知傷身都親眼睇住佢食藥，我更加內疚。
 
返到去佢若無其事咁快快趣食咗藥，然後又繼續埋頭苦幹，又重複著之前嘅日子。
 
我諗唔通點解又要發一場夢。
 
個心口好似俾嘢壓住咁，而又唔講得出嚟，係幾咁辛苦同埋爭扎。
 
任由時間係度一點一滴咁渡過，我只好計劃淨低嗰兩日我要做啲咩。
 




我都決定好聽日去買手信㗎啦，然後就都留係度陪呀詩，執下嘢，最後⋯⋯
 
希望可以好好講聲再見。
 
呀詩除咗嗰次係街上面講過分手之後，佢無再講過呢兩隻字，跟住我哋又好似情侶咁樣一齊。
 
呀詩嘅行為都唔係我熟悉嘅佢，拖拖拉拉咁，一時一樣，好多嘅情緒都選擇收埋，感覺到佢有心底話係度，但唔講出嚟。
 
所有行為都看似正常，但諗深一層係俾到一種奇怪嘅感覺你。
 




所以我預咗今次旅行嘅結束，亦都係我哋嘅結束。
 
可能佢真係唔想再行落去，可能真係大壓力，可能佢需要嘅唔係我，佢想自己一個。不過無論邊一個答案都好，只要有咁樣嘅諗法，一齊再行落去，會越嚟越無意思。
 
唔會係一段健康嘅關係。
 
我哋係由一段健康嘅關係，慢慢變成唔健康。
 
唔知呀詩係咪想係唔清唔楚嘅情況下分開，不過我唔想，因為係佢，因為係我生命中佔據好重要位置嘅關係入面，更加唔想就咁不了了之。
 




我哋都大個啦，我哋真係連好好地說聲再見都做唔到？
 
我並唔期待大人嘅世界係咁懦夫，係咁廢，所以我唔想俾不了了之呢個情況發生。
 
我係腦海度慢慢計劃緊點做，空氣入面充滿住難過嘅味道。
 
又一晚，又沉沉咁瞓死咗。瞓到一半，我夢到廁所⋯⋯下意識知道唔係好事，通常發夢夢到廁所，然後好舒服咁痾呢⋯⋯係一個陷阱嚟！千其唔好中伏啊！
 
我就係喺呢度拉住咗自己，醒一醒，諗住去廁所解決生理問題。
 
我仲遊緊魂，但我feel到我背後有人，坐咗係度，我瞓嗰陣呀詩仲做緊功課，張床得我一個。
 
我知我背後嘅係呀詩，我想起身嘅時候，忽然有隻手係我頭上面，然後輕輕咁掃我個頭。
 
一下、兩下、三下⋯⋯




 
不停來回咁掃，好溫柔，亦都好舒服。
 
我諗呀詩以為我瞓著咗，所以先咁樣嚟摸我。
 
如果唔係我突然想去廁所，我應該真係唔知，因為我係瞓得好熟嗰啲嚟，唔會因為少少嘢就醒。
 
「對唔住。」呀詩一邊撫摸我，一邊對住「瞓熟」嘅我講。
 
「我知咁樣做，會令你受唔少傷，好似俾完希望你，然後又要離開你。」
 
我強忍住自己嘅呼吸，努力扮到好平穩，要好似個石頭人咁，一動不動。
 
但係個心跳跳得好快。
 




「最後我都係好自私咁選擇咗自己，為咗令自己留低個回憶，係因為呢啲嘢係我一路以嚟都好想同你去做。包括想同你結婚生小朋友，呢啲我唔係無幻想過。」呀詩好輕柔，佢嘅聲線同語氣，都好似佢摸我咁輕柔。