《我的MK妹同桌》第二季: 214

我任由呀詩係度瞓，無諗住打擾佢，我就自己係度望住個天花板，自己傷春悲秋。
 
回味緊我哋以前啲回憶，不過依家無之前咁過度放唔開舊回憶，可能因為想向前行。
 
諗嘅係，佢依家啲功課搞唔掂，可能影響佢返去啲成績，唔知會唔會defer，佢仲有實習。
 
「嗯？」呀詩佢嬌柔地輕叫一聲。
 
我俾佢打亂我諗嘢嘅思緒，我感覺到佢捉得我更緊，我忍唔住輕輕咁撥弄佢嘅頭髮，然後一路掃落去，摸摸呀詩臉龐。
 




就係呢啲小細節同埋小動作，令人難以一下子放手。
 
好可惜。
 
但係睇到佢瞓教都皺曬眉頭，瞓都瞓得心神不寧咁，離開可能係俾彼此喘一喘氣。
 
就係見到呢一幕，我就突然諗通曬咁。
 
所有糾結嘅煩惱一下子順曬咁⋯⋯唔想呀詩瞓教都要皺曬眉頭，見到佢咁樣好心酸，我越想靠近，就俾咗好多壓力佢，因為佢亦都要照顧埋我嘅心情、感受，但已經所有嘢都照顧不瑕。
 




係呢個階段，咪嘗試一下自己一個人行下先囉，你都唔知自己會行到邊度。
 
無咗一個你深愛嘅人陪你，難免會寂寞難耐，但換個角度諗，會唔會係一個新嘅開始？
 
結果會唔會未必好似我哋預想咁壞？
 
咁樣分手，一定係一件壞事？
 
我同呀詩嘅人生從此會過得潦倒？
 




我又覺得未必⋯⋯
 
好多動力湧上嚟，我會趁呢段時間試下自己一個人過，陣間咪出去行下囉。我拎起手機，搵下附近嘅地點，安排自己嘅行程。
 
然後又再瞓咗陣。
 
呀詩瞓到流曬口水，佢真係一隻豬嚟，咁多年都無變過。
 
我輕輕甩開隻手，慢慢從呀詩手中抽離。
 
梳洗下，用埋間房整咗個簡單嘅早餐，都係啲麵包啊，腸仔煙肉咁，琴日都有買埋今日早餐嘅料。
 
嗰陣已經朝早11點，我整完呀詩都未起身，我就自己食，打算食完就出發。
 
到我搞掂曬所有嘢，呀詩都未起身，睇嚟佢真係好攰。於是我就自己一個人出門口，留低咗呀詩嗰份早餐，同埋一張紙條，就走咗。




 
我自己都覺得個轉變都有啲快，明明琴日聽完呀詩咁樣講之後仲係度鬱鬱不歡，今日就已經諗通咁，而且真係實行起上嚟。
 
覺得此時嘅自己好不可思議。