《我的MK妹同桌》第二季: 215

就算我自己一個人出去，我都會時不時會諗起呀詩。
 
並唔係因為見到路人成雙成對，然後都想自己隔離有個人陪，而係見到某一樣嘢食，我第一個諗起嘅係：呀詩鍾意食呢個喎。
 
一早已經融入曬係自己生活入面。
 
我去咗唔同嘅地方，用手機記錄咗好多風景，有啲亦有用即影即有記低落嚟。
 
手機無響過，呀詩無send過一句msg過嚟。
 




老實，我呢次出去嘅旅程的確係開心唔起，基本上係帶住sad嘅情緒遊走英國街頭。
 
但係至少有輕鬆、鬆一口氣嘅感覺。係呀詩身邊，經常唔知點算，揸唔住主意，唔知點樣做先為之對佢好，呢種好，係咪正正佢想要嘅。
 
一個人反而無呢種拘謹，其實可能自己並唔係需要將來都自己一個人，或者真係徹底分手。
 
而係好似依家咁，有自己一個人好好地喘喘氣嘅空間同埋時間。
 
我好似明，點解結咗婚嘅男人，有時寧願係樓下公園流連，都唔即刻放工就返屋企。
 




因為呢種空間，可能令自己重獲力量。
 
今日無乜特別嘅事發生，但我好享受呢段時光，同時都擔心呀詩，所以我無出去太耐，半日左右，我就決定返去。
 
我買咗啲嘢食，有啲可以即食，有啲可以煮嘅，係英國買嘢煮都幾方便。
 
返到屋企，呀詩佢已經起咗身，佢如我所想，坐係電腦前面，做緊功課，枱面上留低嘅早餐，已經清空咗。
 
我期待佢會好似以前咁，傻裡傻氣咁衝過嚟，抱住我，向我撒嬌。
 




不過此時嘅佢，選擇坐係電腦前面同功課奮鬥。
 
小小嘅失望並唔影響我，我放低啲嘢，就坐低碌下手機，放鬆下。