《我的MK妹同桌》第二季: 213

我自己一個食飯，睇住自己鍾意嘅食飯，呀詩仲係度忙緊功課，好專心。
 
我自己已經好攰，唔知係咪時差問題，我好眼瞓，幾乎到控制唔到嗰隻。
 
咁我食完就拎埋啲嘢食，擺係呀詩度。
 
「你再忙都要食㗎。」我的確心疼佢，我唔理我哋關係係點，我只係單純地關心佢嘅身體，出自基本禮貌嘅關懷，無論換轉邊個，都會咁樣。
 
淨係呢一點，我諗已經有個分別係度了⋯⋯
 




我嘅出發點，已經唔再係佢係獨一無二嘅存在。
 
「唔好捱壞自己身體啦。」
 
我企係呀詩側邊，望住佢，佢依家都仲打緊份功課，但個樣已經變得憔悴。
 
係好明顯㗎，佢眼皮都變得好重，不停咁要自己集中精神，又無得唔做，啲功課又趕緊要交。
 
我唔知自己可以做啲咩，幫唔到佢啲咩，然後想令自己女朋友開心返上嚟都做唔到，我只能夠棟咗係度，唔識俾反應。
 




「食啲嘢啦。」我再問一次。
 
然後呀詩先抬起頭，望一望我，好似終於意識到，「終於要食嘢啦」嘅感覺。
 
「你食完啦？」呀詩停低啲嘢，伸個懶腰。
 
「食完好耐啦。」我答佢。
 
呀詩聽後，望望前面張食飯枱，我唔理解佢嘅表情，失望？定還是從容？
 




「你咁樣落去對身體唔好喎，隨時病都唔出奇。」
 
「唔會成世都係咁嘅，你定啦。」
 
「咁你唔打算食飯？」我好奇問佢。
 
「我都做到無曬胃口，我遲啲食都得嘅。」呀詩雖然咁講，但佢都拎嘢食過嚟食，「多謝你。」

呀詩都真係有按我要求乖乖地食嘢，但隻眼都係不離電腦裡面嘅功課。
 
我沖埋涼就走咗去瞓，已經用盡我最後嘅精神，呀詩佢都仲搞緊。
 
我明佢嗰種忙碌，對自己有要求就要用盡方法，同時會有好多情緒，大壓力啦，焦慮，急躁。
 
呀詩嘅情緒已經俾呢啲嘢影響曬，加上佢之前係呢度又無人無物，仲要long d而造成嘅各種問題係度。




 
我係度諗緊有咩辦法可以解決得到嘅時候，個腦已經運作唔到，瞓到死咗。
 
我依稀記得有人唔知係邊段時間上咗嚟，瞓係我隔離，無攬住我。
 
只係拖住我，十指緊扣。
 
第二日我好早就起咗身，6點都未夠，呀詩做嘢張枱仲亮住盞燈，但係人已經瞓係我隔離。
 
呀詩熟睡緊，除咗十指緊扣之外，佢仲攬住咗我隻手臂。
 
我嘅心情當下有啲唔係咁開心⋯⋯我察覺到啲異樣。因為平時，或者咁講，以我哋拍拖咁多年嘅關係，我哋瞓教唔會限於攬手臂or拖手瞓。
 
攬住大家入睡，嗰種心安入睡嘅感覺，係好舒服。
 




但自從琴日講開咗之後，我哋之間已經有微妙嘅變化。
 
當講開咗，就係慢慢實行嘅階段。
 
我哋無一下子抽離，而係好似燒炭咁，慢慢步行死亡。慢慢淡出對方嘅生活，一點一點地。
 
明明佢就瞓係我隔離，但我都唔敢伸手過去攬住佢。其實我好想好想，攬住呀詩瞓係件好舒服嘅事。
 
因為佢都做到呢個地步，佢已經係有咁樣嘅決心係度，我亦都唔想表現得猶豫不決，或者⋯⋯會令我哋斷得更快。
 
個心口有啲up住up住咁，微微地刺痛著你。