《我的MK妹同桌》第二季: 212

「之後嘅時間，你都可以揀呢幾日去邊。」呀詩面帶笑容咁講。
 
「下？」我唔理解做咩咁樣。
 
「我只係試下學識放手，用呢段時間。」
 
「同埋我都真係無乜時間，我都要做功課，而且咁樣我哋先無咁痛苦。」呀詩抬頭望望灰濛濛嘅天空，釋然地說。
 
「睇吓我哋可以行到幾遠？」
 




無奈底下，我只好接受。
 
我未搞得清個情緒同埋情況，係咪真係咁樣會好啲呢？我唔知。
 
我唯有試吓呀詩提出嘅方案，既然大家都無方向，暫時都無辦法，俾啲時間緩衝一下，再去深層思考，會對件事更有幫助。
 
一直係度捉住呀詩係度傾都唔係辦法，佢有自己嘅嘢忙，而我都需要時間去諗清楚咩一回事，需要消化吓。
——
剩底嘅，我唔識點回應，當下個腦一片空白，轉唔到。
 




有句說話喺網上睇返嚟，覺得幾啱，用嚟形容依家嘅情況再好不過。
 
『愛情從一開始就是在巔峰時期，相遇便是最美好的狀況，之後就是一路走下斜。無論是不是平線在行走，也是一路往下走。』
 
我哋只係不斷地邁向唔同嘅人生階段，形成一種錯覺係一路進步，一路向上發展緊。
 
呢段時期，消磨最後嘅耐性，唔係彼此間嘅感情，係對呢段關係，無等待落去嘅耐性。
 
仍然為對方著想㗎，仍然唔想見到對方傷心個樣㗎，但係當我哋連返去嘅路程上，因為呢啲說話攤曬出嚟講，之後連拖起隻手都尷尷尬尬咁，失去埋嗰一種動力。
 




就意識到可能我哋真係返唔到轉頭。
 
生活嘅細節挑唔起我哋愛意，只係需要解決嘅一件事。
 
「買啲嘢食返去？」
「好啊。」
「買呢個好無？你鍾意食喎。」
「無所謂啊，你都可以買你鍾意食㗎喎。」
 
原來一段關係喺最後嘅階段，細心嘅溫柔會變成虛假嘅戲碼。
 
只係顧慮著對方感受，而唔敢將最赤裸嘅事實坦白出嚟。
 
可能講出嚟，我哋都會因為咁而崩潰吧？
 




買咗啲嘢食，我哋就返咗去，其實我嘗試想係呢啲生活嘅細節上搵返一啲愛意。
 
嘗試去營造一啲浪漫嘅情節，依家呢個定位好尷尬，亦唔知點樣定義，或者用咩角色面對呀詩。
 
都仲係因為唔甘心？定係純粹想試下我哋係咪真係無愛意？
 
最後我係呢一切嘅反應度，都肯定唔到。似有還無，但我覺得呢一切要咁樣嘅話，已經變得毫無意義。
 
一入屋，呀詩就去做功課，嘢都唔打算食住。
 
我不禁想像，可能我哋各自出嚟社會，忙起上嚟嗰陣就會咁？
 
連同愛情一齊死亡？