《我的MK妹同桌》第二季: 211

呀詩提得出嗰個時間點，我都大約估到接住落嚟要講啲乜。
 
我哋無將所有嘢講到好明，但事情嘅由因，比起上一次，我哋有拎出嚟講。
 
對於呢件事，亦無當初係中學嗰陣時，咁難以接受。
 
時間真係會改變一個人嘅諗法、心態。
 
唔知點解，對於呀詩咁樣講，即使無將「分手」兩隻字明明確確咁講出嚟，我心入面無中四嗰陣咁難受。
 




係時間沖淡咗？係我已經唔再愛呀詩？
 
之前呀詩講「分手」呢兩隻字嗰陣，我個心絞住絞住痛，嗰種痛記得好清楚，個人無力爭扎，呼吸都覺得好重好重。
 
完完全全唔想分開，唔甘心，愛得好強烈。
 
呢啲都係出於自己嘅感受。
 
依家真係想對方好，我覺得係一種昇華嚟，我哋並唔係唔愛，但亦都唔忍心見住對方受苦。一齊唔見得會令件事好咗，唔見得有所舒緩，卻因為仲愛住對方，其實想自私啲，想佢多啲陪自己，想佢係自己身邊，一樣都有佔有慾。
 




不過喺呢個情況，只會令呀詩有更多嘅壓力，佢都唔想。
 
但呀詩唔知咩？佢察覺唔到咩？
 
正正因為佢知，所以佢對於我亦都有愧疚感，因為依家嘅佢俾唔到我，佢根本都做唔到。
 
所以先⋯⋯先至覺得折磨，自己一個反而無咁多嘅束縛、掣肘。
 
我都感受得到，只係成個過程，諗法，我係之後先至諗得徹底明白。
 




同埋，依家嘅我，對於呀詩嘅決定，多咗好幾分尊重。
 
之前嘅我，會將呢一切視為全世界，無辦法將我同呀詩分離。經過呢幾年嘅洗禮，我哋各自都成熟咗，獨立咗，因為經過asso同大學嘅相處，我哋一早已經有咗自己嘅步伐，學識咗無咗對方，我哋都有自己嘅嘢做，唔會將對方視為自己嘅安全感來源。
 
可能我哋經歷過分開，再一齊，都真係有將珍惜兩隻字做到曬。
 
唔再覺得唔甘心，對呢段感情，更多嘅係感激。
 
我愛呀詩啊，呢種感覺一早已經唔同中學嗰嘅純純而又激烈嘅愛。
 
呢種會更長久，亦都更沉重。中學嘅愛情，直白而輕盈，我都好想停留係嗰個階段，不過我更慶幸嘅係，自己有經歷過。
 
「你真係想咁？」心入面好多感受，但一時之間整理唔到，更加唔知講咩好。
 
「以前我會相信無咩係一齊捱唔過，兩個人總有方法可以解決。的確幾天真，依家我更頃向，真係跨唔過嘅，就跨唔過啦，格硬因為呢啲信念而令兩個人都痛苦，好戇居。」就算萬般不想，覺得我哋好可惜，因為咁樣而停低咗我哋腳步。




 
其實都幾沉重。
 
唔再係強烈嘅傷感，唔再係徹夜難眠嘅痛。
 
係你面對現實嘅沉重，最攞命嘅，係你好清醒。
 
你知道自己做緊乜，你係有深思熟慮過，唔再跟住感覺走，知道咩係輕重。